Ndërron jetë “babai i dokumentarëve”, dominoi ekranet për 70 vjet

Ishte “babai i dokumentarëve”, një personazh i njohur dhe i dashur jo vetëm në Italinë e tij, por edhe në Shqipëri, që kur kanalet televizive italiane ishin të vetmet “dritare” të Perëndimit.

Ka ndërruar jetë në moshën 93-vjeçare Piero Angela, gazetari i RAI që prej dekadash ka vënë firmën e tij në emisione mitike si Quark, Super Quark, Ulisse dhe shumë të tjera, vitet e fundit bashkë me djalin Alberto.

Erudit, muzikant i mirë jazz-i në rini, ndjekës i paepur i metodës shkencore dha racionale, Angela ka karakterizuar për 7 dekada televizionin italian, ndoshta një rekord botëror. Gjuha e tij e thjeshtë për të shpjeguar fenomenet e natyrës kanë mbledhur rreth ekranit gjenerata të tëra.

Pak ditë më parë, gazetari kishte shkruar një letër lamtumire për publikun e tij. “Miq të dashur, më vjen keq që nuk mund të jem më me ju në një sezon të ri, pas 70 vitesh. Por edhe natyra ka ritmet e veta. Kanë qenë vite stimuluese që më kanë bërë të njohë botën dhe njeriun. Besoj se e kam bërë pjesën time, mundohuni edhe ju të bëni pjesën tuaj. Përqafime”.

Të shumta kanë qenë reagimet nga institucionet italiane, ndër të parët kryeministri Draghi, i cili e ka cilësuar gazetarin si “një italian i madh, që ka bashkuar vendin si pak të tjerë”.

Rruga Press