Nderimet për Ratko Mlladiçin shkaktojnë mosmarrëveshje të vazhdueshme në Serbi

Një banderolë që dënonte Ratko Mlladiçin si kriminel lufte u hoq nga një ndërtesë në qytetin serb të Novi Sadit, ndërsa vazhdon mosmarrëveshja rreth muraleve që e lavdërojnë shefin ushtarak serb të Bosnjës si një hero.

Autorë të panjohur të enjten hoqën një banderolë me sloganin “Ratko Mlladiç është një kriminel lufte i dënuar për gjenocid” nga ndërtesa në qytetin serb të Novi Sadit, ku ndodhen zyrat e Lidhjes së Social Demokratëve të Vojvodinës, partia politike LSV.

Zëdhënësi i LSV, Aleksandar Marton, tha se herët në mëngjes, një grup burrash ekstremistë të krahut të djathtë u mblodhën në ndërtesë dhe hodhën vezë mbi banderolën.

“Gjatë ditës, rreth orës 13:00, ata u ngjitën në ndërtesën tjetër dhe nga një tarracë, nga një zonë ku mund të hiqej banderola, ata arritën ta hiqnin dhe ta hidhnin atë në tokë”, tha Marton për BIRN.

Banderola e madhe ishte varur në ndërtesën e LSV-së mes tensioneve të vazhdueshme mbi muralet që lavdërojnë Ratko Mlladiçin në kryeqytetin Beograd dhe qytete të tjera serbe.

Aktivistët e të drejtave të njeriut janë përpjekur të prishin ose heqin nderimet për kriminelin serb të Bosnjës, ndërsa nacionalistët janë përpjekur t’i mbrojnë ose t’i pastrojnë ato pasi janë lyer.

Marton shpjegoi se LSV e vendosi banderolën “për shkak të të gjitha gjërave që kanë ndodhur në Serbi në javët dhe vitet e fundit”.

“Ekziston një politikë shumë e fortë e mohimit të krimeve dhe, më e rëndësishmja, mohimit të vendimeve të gjykatave”, tha ai.

Mlladiç u dënua me burgim të përjetshëm nga gjykata e OKB-së në Hagë për gjenocid dhe krime të tjera të kohës së luftës. Por zyrtarët serbë dhe serbë të Bosnjës nuk pranojnë që masakrat e boshnjakëve nga Srebrenica në vitin 1995 nga forcat serbe të Bosnjës përbënin gjenocid.

“Ne shohim atë që po ndodh në Beograd, që njerëzit që duan që Serbia t’i respektojë ato vendime, t’i quajë gjërat me emrin e tyre të vërtetë, ata njerëz sulmohen dhe vihen nën shënjestër, kështu që banderola jonë ishte një mesazh i fortë”, shtoi Martin.

Aktivistët e LSV-së kanë prishur gjithashtu murale dhe mbishkrime kushtuar Ratko Mlladiçit në zonën e Novi Sadit kohët e fundit.

Ndërkohë Ministria e Brendshme e Serbisë tha të enjten se policia ka “identifikuar dhe arrestuar dy të rinj, të moshës 17 dhe 18 vjeç, të cilët hodhën vezë në ambientet e Lidhjes së Social Demokratëve të Vojvodinës mëngjesin e sotëm”.

Ndaj dy të rinjve do të ngrihet kallëzim për kundërvajtje për shkak të dyshimit se kanë kryer sjellje të pahijshme dhe të pamatur”, thuhet në njoftimin e ministrisë.

Mosmarrëveshjet për nderimet për Mlladiçin filluan dy javë më parë kur policia serbe ndaloi një tubim publik të organizuar nga aktivistë që donin të pikturonin muralin në lagjen Vraçar të Beogradit. Dy aktiviste u arrestuan pasi hodhën vezë mbi të, gjë që shkaktoi protesta.

Ish-prokurori i Serbisë për krimet e luftës, Vladimir Vuckoviç, i tha N1 TV të enjten në mbrëmje se ai mbështet gjestin e dy aktivisteve.

“Ato e bënë këtë në zemërim për promovimin e Ratko Mlladiçit, i cili u dënua për urdhërimin e vrasjes së rreth 8,000 civilëve në Bosnje. Dhe shteti, i cili duhet të kishte garantuar sigurinë për grupin e njerëzve që regjistruan tubimin, e ndaloi atë”, tha Vukceviç.

Njerëz të tjerë janë përpjekur të heqin ose prishin muralin e Mlladiçit në lagjen Vraçar, por pa sukses. Grupe të rinjsh të paidentifikuar mblidhen çdo ditë përpara tij për ta mbrojtur atë.

Në dy ditët e fundit, dy imazhe të tjera të mëdha janë pikturuar në mur së bashku me muralin e Mlladiçit, duke nderuar udhëheqësin çetnik serb të kohës së Luftës së Dytë Botërore Dragoslav ‘Draza’ Mihailoviç dhe Zivojin Misiç, një komandant i shquar ushtarak serb nga Lufta e Parë Botërore./Balkan Insight

Rruga Press