NATO nuk mund të jetë ‘naive’ në lidhje me ‘lëvizjet ushtarake’ të Kinës, thotë Rutte

Sekretari i Përgjithshëm i NATO-s, Mark Rutte të martën ngriti shqetësimin për grumbullimin e armëve dhe stërvitjet ushtarake të Kinës pranë Tajvanit.

“Kina po mbështet përpjekjet e Rusisë. Kina po ndërton forcat e saj të armatosura, duke përfshirë marinën e saj, me një ritëm të shpejtë”, u tha gazetarëve Sekretari i Përgjithshëm i NATO-s, Mark Rutte gjatë vizitës së tij të parë në Japoni që nga fillimi i mandatit të tij.

“Ne nuk mund të jemi naivë dhe duhet të punojmë së bashku, të vlerësojmë atë që po ndodh”, shtoi shefi i NATO-s nga porti i marinës japoneze të Yokosuka.

Komentet e Rutte pasojnë një takim të ministrave të jashtëm të NATO-s javën e kaluar, në të cilin shefi i aleancës theksoi se kërcënimet globale të sigurisë janë më të ndërlidhura se kurrë dhe se rritja e shpenzimeve të mbrojtjes është çelësi për të garantuar sigurinë e NATO-s.

“Ne po shohim se çfarë po bën Kina”, ka thënë ai, duke përmendur edhe faktin se rusët po punojnë së bashku me koreano-veriorët, me kinezët, me Iranin.

Ish-kryeministri holandez tha gjithashtu se NATO është e shqetësuar për stërvitjet ushtarake të Kinës pranë Tajvanit dhe “ne i ndjekim ato nga afër”.

Shtetet e Bashkuara duan që anëtarët e NATO-s të përfshihen më shumë në rajonin Indo-Paqësor, ka thënë më tej Rutte.

Ai përshëndeti udhëtimin e fundit të Sekretarit të Mbrojtjes të SHBA Pete Hegseth në Japoni për të siguruar angazhimin e Uashingtonit për të forcuar aleancën e tij me Japoninë dhe praninë në rajon.

Ai theksoi rëndësinë e tij, duke vënë në dukje se Japonia është i vetmi anëtar i Grupit të Shtatë që nuk është në NATO.

NATO ka forcuar gjithashtu lidhjet e saj me Japoninë, Korenë e Jugut, Australinë dhe Zelandën e Re, të njohura si IP4, në vitet e fundit – një veprim që është kritikuar nga Pekini, i cili ka frikë se Uashingtoni po kërkon të krijojë një aleancë të ngjashme me NATO-n në rajon.

Rruga Press