Murati: Vendimi i Supremes për veteranët s’ka lidhje me Qeverinë Kurti, është nga koha e PDK-LDK

Ministri i Financave, Hekuran Murati, ka reaguar pas raportimeve se Gjykata Supreme ka shfuqizuar një udhëzim administrativ të miratuar nga Qeveria Kurti. Ai ka sqaruar se vendimi i Gjykatës lidhet me një udhëzim administrativ të vitit 2015, të miratuar gjatë qeverisjes së koalicionit PDK-LDK.

“Nuk bëhet fjalë për ndonjë udhëzim të miratuar gjatë mandatit të Qeverisë Kurti,” theksoi Murati, duke ftuar mediat që të përmbahen nga raportimet e pasakta.

Sipas tij, Gjykata Supreme ka shfuqizuar një nen të udhëzimit që kërkonte dëshminë nga ATK se veterani nuk ishte i punësuar, pasi ai binte ndesh me ligjin e ndryshuar për veteranët në vitin 2017.

Murati shtoi se Qeveria Kurti është angazhuar për ta hequr kufizimin e punësimit për veteranët dhe do të analizojë nëse vendimi i Supremes është i mjaftueshëm për t’u mundësuar përfitimet edhe atyre që punojnë jashtë sektorit publik.

“Kryeministri Kurti e ka dhënë zotimin publik, dhe ne do të punojmë për ta realizuar atë sa më parë,” përfundoi ministri.

Rruga Press