Moti i keq, vonesa në tragetet drejt Durrësit

Moti i paqëndrueshëm ka shkaktuar vonesa në mbërritjen e trageteve nga Bari drejt Durrësit. Dy tragetet e planifikuara për t’u nisur nga Porti i Barit, mbrëmjen e kaluar, janë nisur prej andej rreth orës 06:00 të mëngjesit të sotëm, ndërsa njëri prej tyre sapo është afruar në Portin e Durrësit, tjetri pritet të hyjë në basenin portual pas rreth 1 ore.

Vonesa ka pasur edhe në nisjen drejt Barit, ndërsa njëri prej trageteve ka pësuar avari në basenin portual, për shkak të manovrave të gabuara.

Forca e detit në Gjirin e Durrësit aktualisht shkon nga 5-6, ndërsa shpejtësia e erës 15-20 m/s, duke bllokuar po ashtu edhe daljen e anijeve të peshkimit në aktivitet, deri në një urdhër të dytë të kapitanerisë.