Moti ekstrem i ka kushtuar Evropës rreth 500 miliardë euro në 40 vjet

Të dhënat e Agjencisë Evropiane të Mjedisit tregojnë se vendet më të goditura janë Gjermania, Franca dhe Italia.

Përmbytjet e rënda dhe moti tjetër ekstrem i kanë kushtuar Evropës rreth gjysmë trilion euro në katër dekadat e fundit, me Gjermaninë, Francën dhe Italinë vendet më të goditura.

90,000 deri në 142,000 vdekjeve iu atribuuan motit dhe ngjarjeve të lidhura me klimën gjatë periudhës 1980-2020, shumica dërrmuese e tyre nga valët e të nxehtit.

Të dhënat, të publikuara nga Agjencia Evropiane e Mjedisit të enjten, nuk tregojnë një tendencë të qartë të rritjes së humbjeve nga ndikimi i krizës klimatike. Kjo për shkak se ndikimet ekonomike priren të përqendrohen në disa ngjarje të mëdha. Më shumë se 60% e humbjeve ekonomike erdhën nga vetëm 3% e ngjarjeve të motit gjatë periudhës – dhe këto mund të godasin kudo dhe të shkaktojnë rezultate shumë të ndryshme.

Ëouter Vanneuville, nga EEA, një nga autorët kryesorë të studimit, tha: “Nuk ka asnjë model të qartë për ngjarjet më ekstreme – ato janë ende të rastësishme, në një masë të madhe. Por përshtatja po vazhdon dhe po ndikon.”

Ai tha se fakti që humbjet nuk po rriteshin qartë nuk duhet t’i bëjë njerëzit të vetëkënaqur, por nënvizoi rëndësinë e përshtatjes së infrastrukturës dhe përgatitjes për motin ekstrem, i cili ka të ngjarë të bëhet më i shpeshtë dhe më intensiv me avancimin e krizës klimatike dhe rritjen e temperaturave.

“Arsyeja që ne nuk shohim një trend nuk është se ndryshimi i klimës nuk është real, por sepse shumë veprime po zhvillohen kundër ndryshimit të klimës. Gjithnjë e më shumë vende po zbatojnë strategji përshtatjeje”, tha ai.

Rruga Press