“Mos gënje kryetar”, Çeku i reagon Përparim Ramës
Ministri i Kulturës,Rinisë dhe Sportit Hajrullah Çeku i ka reaguar kryetarit të Prishtinës Përparim Rama, lidhur me deklaratat e tij për palestrën multisportive dhe zonën ekonomike.
Çeku i ka thënë Ramës se me gënjeshtra nuk ecet përpara.
“Të lutem, Kryetar, mos gënje! Lokacioni i dakorduar nga ju dhe Federata e Basketbollit për realizimin e Palestrës Multisportive gjendet në Hajvali, pranë Qendrës Nacionale të Futbollit dhe nuk ka të bëj fare me lokacionin ku dëshironi ta realizoni projektin e kampusit sportiv në Bernicë, përkatësisht Fshatin Olimpik. Gjatë tërë vitit 2024 Komuna e Prishtinës nuk ndërmori asnjë hap për ta konkretizuar zotimin tuaj dhe plotësuar kërkesën e FBK-së. Me gënjeshtra nuk ecet përpara. Nëse jeni serioz, dërgojeni vendimin në Kuvendin e Komunës për lokacionin që jeni dakorduar me FBK-në duke mundësuar kështu realizimin e plotë të projektit nga MKRS. PS. Nga grupi i VV më thanë që do të votojnë PËR. Dërgoje”, thuhet në reagimin e ministrit Çeku.!
Ndryshe Rama një ditë më parë ka deklaruar se lokacioni dhe plani për palestrën janë refuzuar katër herë nga asambleistët e Vetëvendosjes.
“ Faji për vonesat bie mbi bllokimin e qëllimshëm nga Vetëvendosje dhe jo mbi Komunën”, ka thënë Rama.
Rruga Press