Momenti kur avioni italian ulet si të ishte helikopter

Një avion italian luftarak F35, është ulur vertikalisht në anijen HMS Queen Elizabeth, gjatë një operacioni stërvitor në Detin Mesdhe. Sipas Ministrisë së Brendshme Italiane, përfshirja për herë të parë e kësaj serie avionësh luftarakë është një konfirmim i kapaciteteve të saj për të manovruar në det. Admirali Giuseppe Cavo Dragone, tha se në këtë mënyrë, Italia do të kontribuojë edhe më mirë brenda Bashkimit Europian.

Operacioni stërvitor u zhvillua ndërkohë që në Mesdhe, britanikët dhe amerikanët janë vënë në kërkim të një avioni F-35B Lightning II të Forcave Ajrore të Mbretërisë së Bashkuar, me vlerë rreth 150 milionë euro, të rrëzuar në det javën e kaluar. Mediat britanike thonë që Italia është vendi i tretë që i është bashkuar kërkimeve për aeroplanin ushtarak, për shkak se aleatët perëndimorë nuk duan që ai të bjerë në duart e rusëve, të cilët mund të vjedhin teknologjinë.

Operacioni për gjetjen e avionit të humbur në det është një garë me kohën, pasi në atë zonë operojnë edhe anije ruse, të cilat mund të jenë në gjendje ta nxjerrin e ta studiojnë në detaje. Për gjetjen e avionit sa më shpejt janë të interesuara veçanërisht Shtetet e Bashkuara. Edhe më parë, amerikanët refuzuan t’i shisnin Turqisë avionët model F-35A, për shkak se presidenti Erdogan nuk tërhoqi vendimin për të marrë sisteme mbrojtëse nga Rusia. Pentagoni asokohe tha se nuk dëshironte që rusët të studionin profilin e avionëve amerikanë.

Rruga Press