Ministri Murati demanton Hykmete Bajramin: “Buxheti nuk ka fjetur në sirtar – pse s’e miratoni tani?”
Ministri i Financave, Punës dhe Transfereve, Hekuran Murati, ka reaguar ndaj deklaratave të deputetes së LDK-së, Hykmete Bajrami, lidhur me vonesat në procedimin e buxhetit të Komunës së Prishtinës për vitin 2025.
Në një postim në rrjetet sociale, Murati ka hedhur poshtë pretendimet se Qeveria e Kosovës ka mbajtur në sirtar buxhetin e kryeqytetit, duke theksuar se dokumenti është trajtuar sipas procedurave të zakonshme ligjore.
“Hykmete, u demantuat edhe vetë që Qeveria gjoja nuk e paska përcjellë në Kuvend buxhetin e Prishtinës. Pra, e paska përcjellë. Buxheti i Prishtinës nuk e ka kaluar asnjë ditë në sirtar, por sikurse çdo buxhet tjetër, materiali fillimisht verifikohet nëse është në përputhje me legjislacionin nga Departamenti i Buxhetit në MFPT, e pastaj përcillet për miratim në Qeveri e Kuvend,” ka shkruar Murati.
Ai ka kujtuar se materiali i buxhetit të Prishtinës është dorëzuar në periudhën e festave të fundvitit, çka ka ndikuar në zgjatjen e afatit teknik të shqyrtimit.
“Shto këtu edhe faktin që materiali është dorëzuar në kohën e festave të fundvitit, dhe gati gjysma e ditëve që paske numëruar ose kanë qenë festa zyrtare ose janë ditë fundjave,” ka theksuar ministri.
Murati ka theksuar se problemi kryesor qëndron tek vonesa e Komunës së Prishtinës në dorëzimin e buxhetit përtej afatit ligjor të 30 shtatorit, duke kujtuar se dokumenti është dorëzuar pas miratimit të Ligjit të Buxhetit në lexim të dytë, më 22 nëntor.
“Problemi nuk është tek procedurat standarde, por tek vonesa përtej afatit ligjor që ishte 30 shtatori. E madje vonesa ka qenë edhe përtej datës kur ishte miratuar Ligji i Buxhetit në lexim të dytë,” ka shkruar ai.
Në fund të reagimit, Murati i është drejtuar drejtpërdrejt Bajramit me pyetjen se pse opozita po e vonon tash miratimin e buxhetit në Kuvend.
“Pse nuk po e miratoni tash buxhetin e Prishtinës për vitin 2025, Hykmete? Arsyetimi me Komisionet Parlamentare nuk qëndron. Mund të formohen vetëm Komisionet e Përhershme, për buxhet, legjislacion, integrime, dhe të drejta të komuniteteve. Këto komisione mjaftojnë të trajtohen edhe Buxheti për 2025 për tri komunat, edhe Ligji i Buxhetit 2026, e edhe buxheti për RTK-në,” ka përfunduar Murati.
Ky reagim i ministrit vjen pas akuzave të opozitës se Qeveria po e pengon zbatimin e buxhetit të Komunës së Prishtinës, të drejtuar nga Përparim Rama, për motive politike.
Rruga Press