Ministri gjerman i Mbrojtjes paralajmëron aleatët të përgatiten për luftë: Rusia mund të sulmojë NATO-n brenda 5-8 viteve
Ministri gjerman i Mbrojtjes, Boris Pistorius paralajmëroi të premten se presidenti rus, Vladimir Putin mund të sulmojë një vend të NATO-s “brenda 5-8 viteve”.
“Ne dëgjojmë kërcënime nga Kremlini pothuajse çdo ditë … kështu që duhet të marrim parasysh se Vladimir Putini mund të sulmojë edhe një vend të NATO-s një ditë,” tha Pistorius në një intervistë për gazetën gjermane Der Tagesspiegel.
Teksa një sulm rus nuk ka shumë gjasa “për momentin”, ministri Pistorius shtoi: “Ekspertët tanë llogarisin një periudhë prej pesë deri në tetë vjet në të cilën kjo mund të jetë e mundur”.
Tërheqja e vëmendjes nga Pistorius përkon me paralajmërimet e Ministrit suedez të Mbrojtjes Civile, Carl-Oskar Bohlin, i cili tha se “lufta mund të vijë në Suedi”.
Pistorius tha për Der Tagesspiegel se paralajmërimet suedeze ishin “të kuptueshme nga një perspektivë skandinave”, duke shtuar se Suedia u përball me “një situatë edhe më serioze”, duke pasur parasysh afërsinë e saj me Rusinë.
Suedia gjithashtu nuk është ende anëtare e aleancës së NATO-s, në pritje të miratimit nga Turqia dhe Hungaria.
“Por ne gjithashtu duhet të mësojmë të jetojmë përsëri me rrezikun dhe të përgatitemi – ushtarakisht, shoqërisht dhe në aspektin e mbrojtjes civile,” theksoi Pistorius.
Të martën, e përditshmja gjermane BILD raportoi se qeveria gjermane po përgatit një plan sekret për agresion të mundshëm rus kundër NATO-s, duke thënë më tej se Ministria e Mbrojtjes po përgatitet për një luftë të mundshme gjithëpërfshirëse evropiane në të ardhmen e afërt.
Sipas gazetës BILD, që ka parë planet, “skenari i stërvitjes” i skicuar nga qeveria gjermane parashikon një grumbullim të ardhshëm të trupave ruse në Bjellorusi dhe në enklavën e Kaliningradit, territori më perëndimor i Rusisë, duke ushtruar presion mbi kufirin e Polonisë.
Në përgjigje të këtij kërcënimi në ngritje, plani parashikon që NATO do të vendosë trupat e saj në Evropën Lindore.
Rruga Press