Miliarderi amerikan paralajmëron Trumpin: Po rrezikon një dimër bërthamor ekonomik

Mbështetësi miliarder i Donald Trumpit, Bill Ackman, i ka kërkuar presidentit amerikan të ndalojë tarifat e tij tregtare të shpallura së fundmi, ose do të rrezikojë “një dimër bërthamor ekonomik”.

Të hënën, paralajmërimit të Ackman iu bë jehonë nga një figurë tjetër e shquar e Wall Street, Jamie Dimon, i cili ka thënë se tarifat e Trumpit rrezikojnë të rrisin çmimet për amerikanët.

Pavarësisht valëve tronditëse, presidenti amerikan ka mbrojtur taksat e tij të reja të importit, duke thënë se “ndonjëherë duhet të marrësh ilaçe për të rregulluar diçka”.

Trumpi thotë se masa do të ngjallë SHBA-në me vende të reja pune dhe investime, por ekonomistët paralajmërojnë se çmimet mund të rriten për amerikanët dhe të ndezin një luftë tregtare.

Çmimet e aksioneve në Evropë dhe Azi vazhduan të bien të hënën, teksa tregjet reagojnë ndaj tarifave gjithëpërfshirëse globale të shpallura nga Trump javën e kaluar.

Në postimin e tij në X të dielën, Ackman ka pranuar argumentin e Trumpit se sistemi i tregtisë globale kishte “disfavorizuar” SHBA-në.

Por ai ka shtuar se tarifat që Trumpi ka vendosur janë “masive dhe joproporcionale” dhe nuk bënin dallim midis miqve dhe armiqve amerikanë.

Ackman, themeluesi miliarder i kompanisë së menaxhimit të fondeve mbrojtëse “Pershing Square”, u bë një mbështetës i profilit të lartë i Trumpit, në korrik të vitit 2024.

Ai kishte mbështetur më parë Partinë Demokratike rivale dhe ndërhyrja e tij u pa si një mbështetje e rëndësishme elektorale nga bota e biznesit.

Në njoftimet e tij javën e kaluar, Trumpi ka shpallur një tarifë “bazë” 10% për importet në SHBA, me norma më të larta deri në 50% me të cilat përballen dhjetëra vende të tjera – duke përfshirë një numër qendrash të rëndësishme prodhuese në Azi.

Shumë vende janë zotuar të përgjigjen dhe Kina tashmë është kundërpërgjigjur me tarifa të reja të saj për mallrat e importuara nga SHBA-ja.

Trumpi ka nisur një “luftë ekonomike kundër gjithë botës menjëherë” që rrezikon të shkatërrojë besimin e investitorëve në SHBA, sipas Ackman.

Rruga Press