Milan Radojičić – dje dhe sot…

Shkruan Enver Robelli

Milan Radojičić arrin t’i shmanget policisë së Kosovës nga duart dhe të “zhduket” në Serbi. Një dështim kolosal i forcave të rendit. Ky dështim tregon se në veri të vendit mund të ketë policë që bashkëpunojnë ngushtë me strukturat kriminale. Duhet hetim e ndëshkim i policëve që kanë qenë pjesë e këtij dështimi. Duhet të dërgohen komplet njësi të tjera në pikat kufitare në veri në mënyrë që krimi të luftohet në mënyrë efikase.

Sa për krahasim: më 2018 presidenti Hashim Thaçi e kritikonte ashpër kryeministrin Ramush Haradinaj për takimin me bosin e mafies në veri. Muaj më vonë Haradinaj thoshte: “Milan Radojičićin e kam takuar në zyrën e Thaçit”. Por ka edhe fotografi të Milan Radojičićit në zyrën e Haradinajt.

Ka një përparim të vogël: më 2018 dhe 2019 presidenti dhe kryeministri kosovar shtyheshin e fyheshin me njëri-tjetrin duke u akuzuar e kundërakuzuar se kush e ka jaraninë më të trashë me një mafioz të dyshuar që ndërkohë e ka emrin edhe në listën e zezë të SHBA-ve. Më 2022 Milan Radojičići nuk guxon t’iu afrohet zyrave të udhëheqësve të Kosovës. Përparimi i madh ndodh kur Radojičići të arrestohet!

Rruga Press