Më në fund, Britania ia jep Gjibraltarit statusin e qytetit

Gjibraltari është një territor britanik në jug të Spanjës dhe tash zyrtarisht mund të quhet qytet, 180 vjet pasi iu dha për herë të parë ky status nga Mbretëresha Victoria.

Ky territor britanik jashtë shtetit u ofrua të bëhej qytet në fillim të këtij viti, si pjesë e Jubileut Platinum të Mbretëreshës (Elizabeth II). Por kur studiuesit shikuan Arkivat Kombëtare, ata zbuluan se ishte njohur tashmë si qytet më 1842.

Gjibraltari tani ka rifituar statusin që kërkonte, me kryeministrin në largim Boris Johnson që e përshkruan atë si një “lavdërim të jashtëzakonshëm” duke festuar “historinë dhe dinamizmin e tij të pasur”.

Gjibraltari ka qenë një territor britanik përtej detit që nga viti 1713, kur iu dorëzua Britanisë sipas një traktati paqeje të nënshkruar pas Luftës së Trashëgimisë Spanjolle.

Konkursi jubilar pa 39 vende të aplikojnë për t’u bërë qytete, me tetë, duke përfshirë Doncaster, Bangor dhe Dunfermline, që përfundimisht fituan statusin.

Statusi i një qyteti shpesh shoqërohet me ekzistencën e një katedraleje, një universiteti ose një numri të madh banorësh, por nuk ka rregulla të përcaktuara për dhënien e tij – ai jepet nga monarku me këshillën e ministrave.

Statusi i qytetit sjell pak përfitime materiale, megjithëse shpesh mund t’u japë një shtysë komuniteteve duke i vendosur ato në hartë dhe zakonisht është një burim krenarie për banorët.

Qeveria tha se Gjibraltari u la jashtë listave zyrtare pasi fillimisht iu dha titulli nga Mbretëresha Victoria, por nuk është e qartë se si ndodhi kjo.

Tani është publikuar një rekord i përditësuar i 81 vendeve të emërtuara si qytete.

Gjibraltari është një nga vetëm pesë qytetet britanike të njohura jashtë Britanisë së Madhe. Të tjerat janë Hamilton në Bermuda, Jamestown në Saint Helena, Douglas në Ishullin e Manit dhe Stanley në Ishujt Falkland.

Rruga Press