Mbi 700 të vrarë për 24 orë në Gaza, OKB akuzon Izraelin për shkelje të ligjeve ndërkombëtare

Thellohet tragjedia në rripin e gazës, ku sipas autoriteteve palestineze më shumë se 700 persona u vranë në 24 orë si pasojë e bombardimeve izraelite.

Bilanci dramatik, më i larti që prej shpërthimit të luftës më 7 tetor, vjen teksa agjencia kryesore e OKB, që është edhe furnizuesja më e madhe e ndihmave në rripin e gazës, njoftoi se do të ndërpresë të gjitha shërbimet në zonë, si pasojë e mungesës së karburantit.

Spitalet gjithashtu do të ndalin çdo operacion përveç atyre të emergjencës teksa Tel Avivi refuzon të lejojë hyrjen e furnizimeve me pretendimin se do të shfrytëzohen nga Hamasi.

“Karburanti nuk do të hyjë në Rripin e Gazës. Hamasi përdor naftën për infrastrukturën ushtarake. Militantët le t’i japin spitaleve karburantin që vjedhur nga Agjencia e OKB”. Daniel Hagari, zëdhënës i ushtrisë Izraelite

Mjekët paralajmërojnë se spitalet më të mëdha ku çdo ditë mbërrijnë qindra të plagosur mund të kthehen në varreza masive. Mungesa e karburantit, do të pamundësonte funksionimin e pajisjeve të ventilimit që mbajnë në jetë pacientët në terapitë intensive.

Emocionet ishin të larta mbrëmjen e së martës në Këshillin e Sigurimit të OKB, pasi Sekretari i Përgjithshëm, Antonio Guterres bëri thirrje për armëpushim të menjëhershëm humanitar, duke thënë se shkelje të qarta të ligjit ndërkombëtar humanitar po dëshmohen në Gaza.

“Jam thellësisht i shqetësuar për shkeljet e qarta të ligjit ndërkombëtar që po dëshmojmë në Gaza. Me lejoni të jem i qartë. Asnjë palë në një konflikt të armatosur nuk është mbi ligjin ndërkombëtar.” Antonio Guterres

Deklarata e Sekretarit të Përgjithshëm të OKB nxiti reagimin e ashpër të Izraelit që kërkoi dorëheqjen e Guterres.

Ambasadori i Tel Avivit në OKB, Gilad Erdan tha se vendi i tij do t’i mohojë hyrjen në vend, funksionareve tË organizatës. “Është koha t’i japim atyre një leksion”, ishin fjalët e tij.

Në shënjestër të fushatës bombarduese të Izraelit është vene edhe bregu perëndimor, ku gjatë natës u vranë 3 palestinezë. Sakaq, Siria raportoi se 8 ushtarë të këtij vendi ishin vrarë në sulmet ajrore izraelitë kundër pozicioneve në Daraa. 

Rruga Press