Marrëveshja për rregullat e teknologjisë së BE-së mund të arrihet në qershor

Ligjvënësit dhe vendet e Bashkimit Evropian mund të arrijnë një marrëveshje deri në fund të muajit qershor mbi rregullat e propozuara të teknologjisë, të cilat detyrojnë platformat online të kontrollojnë më mirë internetin, pavarësisht dallimeve në qasjen e tyre, ka thënë të hënën ligjvënësi që drejton negociatat.

Akti i Shërbimeve Dixhitale (DSA), i propozuar nga shefja e BE-së për antitrust, Margrethe Vestager, detyron Amazon.com, Apple, Alphabet, njësinë Google dhe pronarin e Facebook Meta, të bëjnë më shumë për të trajtuar përmbajtjen e paligjshme në platformat e tyre përndryshe do të përballen me gjoba deri në 6 për qind të qarkullimit global.

I pari i këtij lloji në botë, propozimi i Vestager duhet të miratohet nga vendet e BE-së dhe ligjvënësit përpara se të bëhet ligj.

“Unë jam optimist se mund të bëjmë një marrëveshje përpara fundit të qershorit”, ka thënë ligjvënësja Christel Schaldemose, raporton Reuters.

Komentet e saj erdhën përpara bisedimeve me ministrin francez të çështjeve dixhitale dhe shefin e industrisë së BE-së të martën.

Ky takim ishte i dyti i tyre mbi këtë çështje, ndërsa një i tretë është planifikuar më 15 mars.

Schaldemose ka thënë se ligjvënësit duan të zgjerojnë fushëveprimin e asaj që duhet të bëjnë platformat online, të ndalojnë modelet e errëta që mashtrojnë njerëzit në dhënien e të dhënave personale kompanive në internet.

Ajo ka shtuar se vende si Irlanda, ku Apple, Facebook dhe Google kanë selitë e tyre evropiane, dhe Luksemburgu, ku ndodhet Amazon, duhet të vazhdojnë të mbikëqyrin kompanitë në përputhje me parimin e “vendit të origjinës”.

Rruga Press