Manipulimi serb/ Vuçiqi e mediat serbe thirrjen “Lajmërohu Adem” e përkthejnë si “lërini të vdesin”

“Adem, Adem – Adem Ribari lajmërohu”, kaq dëgjohet në incizimet që presidenti serb Aleksandër Vuçiq i paralajmëroi në konferencën e së dielës, si “përgjime skandaloze të Policisë së Kosovës”.

Vuçiqi pretendonte se në këto incizime policët qeshnin dhe bënin thirrje për mosshpëtimin e sulmuesve serbë që ishin plagosur.

“Ne kemi edhe incizimin me zë se si qeshet policia shqiptare dhe si thonë ‘lëni të vdesin, nuk kemi arsye të ndihmojmë’ i kemi incizimet me zë, do ta shohim se si dikush po e bën punën në mënyrë profesioniste”, ka thënë Vuçiqi në konferencën e së dielës.

Por, nga ajo që është publikuar në mediat serbe, shihet se nuk përkon as për së afërmi me atë që Vuçiqi ka deklaruar.

Në përshkrimin e gazetës serbe “Novosti” ky incizim përshkruhet me titullin “E tmerrshme: Dëgjoni incizimin e bisedës së policëve të Kosovës teksa po qëllojnë në drejtim të serbëve”.

Në incizim nuk dëgjohen të shtëna.

Rruga Press