Lufta në Ukrainë, Ministri ukrainas: Rusia po planifikon ofensivën më 24 shkurt

Ministri i Mbrojtjes i Ukrainës ka thënë se Rusia po përgatit një ofensivë të re të madhe dhe paralajmëroi se ajo mund të fillojë më 24 shkurt.

Oleksii Reznikov tha se Moska kishte grumbulluar mijëra trupa dhe mund të “provojë diçka” për të shënuar përvjetorin e pushtimit fillestar vitin e kaluar.

Sulmi do të shënonte gjithashtu Ditën e Mbrojtësit të Atdheut të Rusisë më 23 shkurt, e cila feston ushtrinë.

Reznikov tha se Moska kishte mobilizuar rreth 500,000 trupa për ofensivën.

Në shtator, presidenti rus Vladimir Putin njoftoi një mobilizim të përgjithshëm të rreth 300,000 trupave të rekrutuar, të cilat ai tha se ishin të nevojshme për të siguruar “integritetin territorial” të vendit.

Por zoti Reznikov sugjeroi se shifra e vërtetë e rekrutuar dhe e vendosur në Ukrainë mund të jetë shumë më e lartë.

“Zyrtarisht ata shpallën 300,000, por kur shohim trupat në kufi, sipas vlerësimeve tona është shumë më tepër”, tha ai për rrjetin francez BFM.

Pavarësisht disa luftimeve të rënda në rajonin lindor të Donbasit, lufta ka hyrë në një ngërç në muajt e fundit që kur Ukraina rimori qytetin jugor të Khersonit.

Rruga Press