Lufta e Re Baltike: Si po përgatitet Rusia e Putinit për teatrin e saj të radhës të operacioneve

Në një artikull të botuar në revistën prestigjioze International Affairs, e lidhur drejtpërdrejt me Ministrinë e Jashtme ruse, Moska lëshon një paralajmërim të qartë: pjesa lindore e Detit Baltik duhet konsideruar si një teatër i mundshëm operacionesh ushtarake.

Kjo qasje, e mbështetur nga studiues të lidhur me Kremlinin si Nikolaj Mezheviç, përpiqet të legjitimojë retorikën e Putinit duke e paraqitur NATO-n dhe vendet baltike si kërcënim ekzistencial për Rusinë. Artikulli nuk shpall hapur një manifest lufte, por përmes një “analize akademike” të shtrembëruar historikisht, justifikon idenë se Moska s’ka rrugë tjetër veçse të përgatitet për një përplasje të re ushtarake.

Në këtë narrativë, vendet e rajonit – nga Estonia te Suedia e Finlanda – shfaqen si agresorë të dobët, por potencialisht të rrezikshëm. Kjo krijon bazën për atë që rusët e quajnë “zona gri”: një hapësirë e paqartë ku konflikti nuk shpërthen drejtpërdrejt, por zhvillohet përmes presionit ekonomik, propagandës, sulmeve kibernetike dhe sabotimeve.

Stërvitjet ushtarake Zapad-2025, që po zhvillohen pranë kufirit bjellorus, janë pjesë e këtij skenari. Ato jo vetëm testojnë kapacitetet e ushtrisë ruse, por edhe përgatisin elitën politike dhe strategjike për një realitet të ri: mundësinë e një “Lufte Baltike”.

Studiues si Katerina Kesa, Lukas Milevski dhe Teija Tiilikainen theksojnë se ky diskurs synon të delegjitimojë shtetet baltike dhe të justifikojë zgjerimin e influencës ruse. Për ta, ky është një déjà vu i rrezikshëm, ngjashëm me retorikën që parapriu luftën në Gjeorgji (2008) dhe agresionin ndaj Ukrainës (2014 dhe 2022).

Në thelb, bëhet fjalë për një normalizim të idesë së luftës në Baltik, duke e kthyer rajonin nga një hapësirë bashkëpunimi pas Luftës së Ftohtë në një zonë rivaliteti të hapur ushtarak. /Le Grand Continent/

Rruga Press