Liderët perëndimorë takohen për të diskutuar përkrahjen për Ukrainën

Presidenti i SHBA-së, Joe Biden, do t’i bashkohet të enjten liderëve perëndimorë në Bruksel për tri samite që do të mbahen për pushtimin rus të Ukrainës, raporton BBC.

NATO, G7 dhe BE-ja të gjitha do të mbajnë takime, në një shfaqje të rrallë të unitetit nga Perëndimi.

Biden do të marrë pjesë në të tri takimet, ndërsa është hera e parë që një president i SHBA-së merr pjesë në një samit të BE-së në Bruksel.

Por, vizita e tij në Bruksel nuk është vetëm simbolizëm.

Pushtimi rus i Ukrainës i ka dhënë një qëllim të ri. Ndërsa BE-ja përpiqet të ndërpresë lidhjet me Rusinë në fushën energjetike, duhet të krijojë dhe forcojë marrëdhënie të reja, veçanërisht me SHBA-në.

Presidenti i Ukrainës, Volodymyr Zelensky, do të shfaqet në një videolidhje si në takim të liderëve të NATO-s ashtu edhe të atyre të BE-së.

Presidentët e NATO-s dhe kryeministrat do të pajtohen për mbështetje më të madhe për Ukrainën dhe për vendosjen e trupave të reja tek aleatët në lindje të Evropës. Synimi është të shfaqet solidaritet me Kievin.

Shumë nga shtetet, ndonëse jo të gjitha, kanë qenë të gatshme ta furnizojnë me armë Ukrainën.

Mbretëria e Bashkuar tha se do të përdorë takimet e G7 dhe NATO-s për të “rritur ndjeshëm ndihmën për mbrojtje të Ukrainës”.

Rruga Press