Lajçak: Me Osmanin u dakorduam të përshpejtohet puna për zbardhjen e fatit të të zhdukurve

Emisari special i BE-së, Miroslav Lajçak ka dhënë detaje nga takimi i tij me presidenten Vjosa Osmani.

Ai ka shkruar në Twitter se së bashku me emisarin special të SHBA-së për Ballkanin Perëndimor, Gabriel Escobar, kanë zhvilluar sot një takim me presidenten Vjosa Osmani, në ditën e parë të vizitës në Kosovë.

“Ndër të tjera, ramë dakord për nevojën e përshpejtimit të punës për zbardhjen e fatit të personave të zhdukur”, ka shkruar diplomati sllovak.

Çështja e ta pagjeturve ka qenë pjesë e dialogut ndërmjet Kosovës dhe Serbisë në Bruksel. Në shtator të vitit 2020, zyrtarët e delegacionit të Kosovës kishin deklaruar se është arritur me Serbinë një marrëveshje për të pagjeturit. Por, ata nuk patën sqaruar detajet e marrëveshjes.

Në qershor të vitit të kaluar, kryeministri Albin Kurti ka thënë se çështja e të pagjeturve është një plagë e hapur dhe se është e rëndësishme të hapen arkivat shtetërore të Serbisë.

Mbi 1600 persona konsiderohen si të pagjetur që nga koha e luftës në Kosovë.

Ai gjithashtu ka bërë të ditur se me kryeministrin Albin Kurti kanë diskutuar për dialogun Kosovë-Serbi.

Rruga Press