Kush janë blerësit më të mëdhenj të naftës ruse?

Pavarësisht përpjekjeve të Perëndimit për të kufizuar të ardhurat e Rusisë nga eksporti i naftës, vendet si Kina, India dhe Turqia vazhdojnë të blejnë sasi të mëdha të naftës ruse — dhe kështu ndihmojnë indirekt financimin e luftës së Moskës në Ukrainë.

Presidenti amerikan Donald Trump ka ngritur çështjen e blerjes së naftës ruse nga Kina dhe India, duke u bërë presion që ta ndalin këtë praktikë. Kjo përpjekje vjen në kuadër të tentativave të tij për të shtyrë presidentin rus Vladimir Putin drejt një armëpushimi.

Por për këto shtete, nafta ruse nuk është thjesht çështje politike — është çështje përfitimi. Çmimi i ulët i naftës ruse krahasuar me tregun ndërkombëtar e bën shumë të leverdishme për rafineritë e tyre, duke u rritur marzhin e fitimit.

Që nga janari 2023, kur Bashkimi Evropian vendosi bojkotin për shumicën e naftës së dërguar me anije nga Rusia, Kina ka marrë vendin e parë si blerësja kryesore e energjisë ruse, me importe që kapin vlerën e 219.5 miliardë dollarëve. Pas saj renditet India me 133.4 miliardë dhe Turqia me 90.3 miliardë dollarë. India, përpara pushtimit të Ukrainës, kishte shumë pak marrëdhënie tregtare me Rusinë në sektorin e naftës.

Nga BE-ja, Hungaria është ndër të vetmet vende që ende importon naftë ruse përmes një tubacioni të drejtpërdrejtë, duke reflektuar qasjen e saj të veçantë ndaj sanksioneve, për shkak të qëndrimeve pro-ruse të kryeministrit Viktor Orbán.

Sipas Shkollës Ekonomike të Kievit, Rusia ka fituar 12.6 miliardë dollarë vetëm në qershor nga eksportet e naftës. Edhe pse vendet e G7 kanë vendosur një kufi çmimi për naftën ruse, Moska po arrin ta anashkalojë përmes një “flote hije” anijesh të vjetra që përdorin sigurues dhe ndërmjetës të vendosur në shtete që nuk i zbatojnë sanksionet.

Për këtë vit, eksportuesit rusë të naftës parashikohet të arkëtojnë rreth 153 miliardë dollarë. Këto të ardhura janë burimi më i madh i të ardhurave për buxhetin rus, duke ndihmuar në mbajtjen e vlerës së rublës dhe financimin e blerjeve të pajisjeve ushtarake.

Rruga Press