Kurti: Vendimi i BQK-së për dinarin, i panegociueshëm! S’po prodhojmë valutën e re ‘Dardane’, euro vjen nga BE

January 31, 2024 User2

Kryeministri i Kosovës, Albin Kurti, ka thënë se vendimet e Bankës Qendrore të Kosovës (BQK) janë të pavarura dhe se ajo vetëm është duke e bërë punën e saj.

Në një deklarim për media, pasi që ka bërë homazhe tek shtatorja e Zahir Pajazitit në Podujevë, Kurti nuk ka folur lidhur me kërkesat e ndërkombëtarëve për shtyrje të ekzekutimit të rregullores së BQK-së, sipas të cilës nga 1 shkurti në Kosovë të gjitha pagesat duhet të kryhen në euro dhe se kjo çështje është e panegociueshme.

“Pra në katër komunat në veri janë katër degë të bankave dhe janë 15 institucione financiare jobankare ku do të mund të dërgohen dërgesat e pagesat dhe ku do të mund të merren të gjitha ato në euro. Euroja është valutë që na vjen nga BE-ja, ne nuk jemi duke i thënë askujt merre valutën lekë të Shqipërisë apo një valutë të re Dardan të Kosovës, por euron, euro si mjeti i vetëm i pagesës edhe i shitblerjes i përcaktuar në mënyrë të qartë në RKS nuk është një çështje e negociueshme”, ka theksuar Kurti.

Ai ka theksuar se rregulloret e BQK-së janë në përputhje me Kushtetutën dhe ligjin.

Lexo më shumë Emigracioni i të rinjve në Shqipëri dhe kostot e jetesës ulin lindjet me 35% në një dekadë

“Vendimet e Bankës Qendrore të Kosovës (BQK) janë vendime të pavarura, sepse BQK-ja është institucione i pavarur, rregullat të cilat ata i sjellin, rregulloret të cilat ata i miratojnë janë krejtësisht në përputhje me Kushtetutën dhe ligjin, dhe unë besoj që duhet ta lëmë të qetë BQK-në dhe guvernatorin, Ahmet Ismaili, që ta bëjë punën e tija ashtu siç e ka fituar besimin në Kuvend”, është shprehur Kurti.

Sipas tij Ismaili po bën punë shumë të mirë dhe e ka shpjeguar saktë se nuk do të kemi probleme me dikë që mund të ketë ndonjë valutë të huaj, por se në Kosovë e vetmja valutë e shkëmbimit, e shitblerjes është euroja.

Lexo më shumë Maqedonci: Raketat që Serbia ka blerë nga Kina janë sulmuese dhe kërcënuese për rajonin

“Ne nuk po dëshirojmë të ndëshkojmë askë, por vetëm të sjellim ligjshmëri, kushtetutshmëri dhe rregullsi, edhe në veriun e Kosovës edhe gjithandej ku ka serbë në Kosovë, që janë një komunitet i cili po ashtu mua me ka kryeministër e Ahmet Ismailin e ka guvernator. Jemi dëshmitarë që me masat që i kemi marr ndaj tyre shumica dërrmuese e tyre kanë llogari bankare në bankat e Kosovës e nëse nuk e kanë edhe hapjen e një xhirollogarie edhe mirëmbajtjen e saj e kanë falas”, është shprehur Kurti.

Rruga Press