Kurti takon Peach, flasin për vendosjen e ushtrisë serbe afër kufirit me Kosovën

Kryeministri i Kosovës, Albin Kurti të mërkurën ka takuar të dërguarin e Posaçëm të Mbretërisë së Bashkuar për Ballkanin Perëndimor, Lord Stuart Peach.

Siç ka njoftuar Zyra e Kryeministrit, në takimin e gjashtë ndërmjet tyre këtë vit ata kanë diskutuar për marrëdhëniet dypalëshe, zhvillimet e fundit dhe situatën e sigurisë në vend, përkatësisht në kufirin me Serbinë pas sulmit terrorist dhe paramilitar në Banjskë dy muaj më parë.

Po ashtu, Kurti dhe Peach kanë diskutuar edhe për dislokimin përgjatë kufirit të sistemit kundër-ajror të ushtrisë serbe, “e vetmja në Evropë që operon me armatim dhe sistem raketor kinez, sikurse ai FK-3”.

“U bisedua edhe për procesin e dialogut të ndërmjetësuar nga Bashkimi Evropian, por edhe për takimin e 26 tetorit me liderët evropianë në Bruksel, si një hap dhe përpjekje e rëndësishme drejt normalizimit të marrëdhënieve ndërmjet Republikës së Kosovës dhe Serbisë por edhe si mundësi e humbur për të nënshkruar marrëveshjen si garanci e zbatimit të plotë”, thuhet në njoftimin e Zyrës së Kryeministrit.

Kryeministri Kurti ka falënderuar Peach për bashkëpunimin me Mbretërinë e Bashkuar në fushën mbrojtjes dhe rolin aktiv të saj në fushën e sigurisë, veçanërisht përmes misionit të KFOR-it.

Gjithashtu, në takim Kurti ka theksuar se zbarkimi i një kontingjenti prej 200 ushtarëve britanikë në Kosovë, si kundërpërgjigje ndaj sulmit terrorist të 24 shtatorit, po i kontribuon situatës së sigurisë.

Rruga Press