Kurti në Skenderaj: Lushtaku, ish-komandanti multimilioner që kënaqet kur i frikësohen njerëzit

Kryeministri i Kosovës, Albin Kurti, ka ngritur kritika të ashpra ndaj pushtetit aktual në Skenderaj, duke e cilësuar atë si të zhveshur nga programi dhe idetë. Në një deklaratë të fuqishme, Kurti ka vënë në shënjestër ish-komandantin Sami Lushtaku, të cilin e ka quajtur “multi-milioner që kënaqet kur i frikësohen njerëzit.”

Sipas Kurtit, kjo gjendje përfaqëson një devijim të rëndë nga sakrifica e dëshmorëve, martirëve dhe gjithë atyre që kontribuan për çlirimin dhe ndërtimin e një shteti të lirë dhe demokratik. Ai shtoi se funksionet publike nuk janë për pasurim e sundim, por për shërbim me përkushtim.

Në këtë frymë, Kurti promovoi kandidatin për kryetar të Skenderajt nga radhët e VV-së, Hysni Mehanin, të cilin e përshkroi si “aktivist të devotshëm, të dijshëm, modest e trim, që bashkon e nuk përçan”.

Ai tha se pas 12 tetorit, me Hysni Mehanin në krye, Skenderaj do të nisë një epokë të re investimesh dhe zhvillimi: zgjidhje për problemin me ujin e pijes, ndërtim të çerdheve të reja, realizim të ngrohtores së qytetit, trafik publik, pishinë gjysmë-olimpike, parqe për fëmijë, park teknologjik inovativ, shtigje për ecje dhe vrapim, si dhe një riorganizim të drejtorive komunale për të rritur investimet kapitale.

“Me Hysni Mehanin shërbejmë me pasion, dije e punë. Skenderaj me të në krye, pas 12 tetorit, me pendën e Kuçicës niset drejt zhvillimit të merituar”, përfundoi Kurti.

Rruga Press