Kurti në Konferencën e Sigurisë në Mynih takon presidenten e BERZH-it

Kryeministri i Kosovës, Albin Kurti, ka takuar Presidenten e Bankës Evropiane për Rindërtim dhe Zhvillim (BERZh), Odile Basso, në Konferencën e Sigurisë në Mynih të Gjermanisë.

Ata diskutuan për bashkëpunimin e deritanishëm ndërmjet Qeverisë dhe BERZh-it, projektet që janë në zbatim e sipër me mbështetje të BERZh-it, si dhe për mundësitë e reja të bashkëpunimit.

Në komunikatën e dërguar nga Kryeministria thuhet se, Kurti falënderoi presidenten e BERZh-it për mbështetjen e vazhdueshme që ky institucion i ka dhënë Kosovës ndër vite dhe se te BERZh-i, Qeveria e Kosovës sheh një partner të rëndësishëm në realizimin e qëllimeve të saj në zhvillim të qëndrueshëm, veçanërisht në fushën e transportit, digjitalizimit, energjisë dhe sektorit privat.

“Duke theksuar zhvillimin ekonomik dhe demokracinë cilësore në vend, Kryeministri Kurti veçoi trendin pozitiv të rritjes ekonomike në dy vitet e fundit dhe përmirësimin për 20 pozita në Indeksin e Korrupsionit të Transparency International, për 17 pozita në indeksin e Reporterëve Pa Kufi për lirinë e shtypit dhe renditjen në vendin e parë për herë të dytë radhazi në Ballkanin Perëndimor për sa i përket sundimit të ligjit sipas Projektit të Drejtësisë Botërore. Kryeministri Kurti e njoftoi presidenten Basso edhe për aplikimin e Kosovës në Këshillin e Evropës në maj të vitit të kaluar, si dhe në Bashkimin Evropian, në dhjetor të vitit 2022, thuhet në komunikatë.

Ndërsa, Basso ka shprehur përkushtimin e BERZh-it për të bërë edhe më shumë në mbështetje të Kosovës, me theks në fushën e energjisë së ripërtëritshme dhe të efiçiencës së energjisë dhe sektorin privat.

Rruga Press