Kurti në Athinë, shtrëngon duart me presidentin ukrainas Volodymyr Zelensky

Kryeministri i Kosovës, Albin Kurti ndodhet në Greqi ku mbrëmë ka marrë pjesë në darkën joformale të shtruar nga homologu i tij grek, Kyriakos Mitsotakis.

Gjatë qëndrimit në Athinë, Kurti pati rastin të përshëndetet me presidentin e Ukrainës, Volodymyr Zelensky, i cili gjithashtu ishte i ftuar në darkën joformale së bashku edhe me liderët e tjerë të Ballkanit Perëndimor dhe ata të BE-së.

Kurti e ka publikuar një video të shkurtër në rrjetin social Facebook, teksa shihet duke shtrënguar duart me Zelenskyn.

“Në prag të darkës së shtruar nga kryeministri grek Kyriakos Mitsotakis me pjesëmarrje të presidentit ukriainas, Volodymyr Zelenskyy”, ka shkruar Kurti.

Ky po vlerësohet si një nga takimet më të rëndësishme për Evropën Lindore.

Kujtojmë që takimi është zhvilluar pa prezencën e kryeministrit shqiptar, Edi Rama, i cili u raportua se nuk ishte ftuar fare në këtë darkë.

Udhëheqësit e vendeve të Ballkanit Perëndimor dhe të Bashkimit Evropian shprehën mbështetjen dhe solidaritetin e tyre me popullin ukrainas në luftën e tij kundër pushtimit rus.

Në darkën joformale në Athinë morën pjesë: presidentët e Këshillit të Evropës dhe Komisionit Evropian, Charles Michel dhe Ursula von der Leyen, kryeministri i Kosovës, Albin Kurti, presidenti i Serbisë, Aleksandar Vuçiq, presidenti i Malit të Zi, Jakov Millatoviq, kryetarja e Këshillit të Ministrave të Bosnje e Hercegovinës, Borjana Krishto, dhe kryeministri i Maqedonisë së Veriut, Dimitar Kovaçevski.

Të pranishëm ishin edhe kryeministrat e vendeve anëtare të BE-së nga rajoni – Andrej Pllenkoviq i Kroacisë, Ion-Marcel Ciolacu i Rumanisë dhe Nikolai Denkov i Bullgarisë, si dhe presidenti ukrainas, Volodymyr Zelensky, dhe presidentja moldave, Maia Sandu.

Rruga Press