Kurti: Me mall e dhembje, i kujtojmë sot dhe ҫdo ditë, të gjithë të vrarët dhe të zhdukurit me dhunë nga Serbia

Kryeministri i Kosovës, Albin Kurti ka kujtuar 25 vjetorin e rrëmbimit të katër djemve të Ferdonije Qerkezit.

Me anë të një postimi në Facebook, ai tha se shtëpia e familjes Qerkezi dëshmon gjenocidin dhe spastrimin etnik të Serbisë në Kosovë.

“Në rrugën “Martirët Qerkezi”, në shtëpinë-muze qëndron Nëna Ferdonije. Brenda shtëpisë së zbrazët, ajo jeton mes kujtimeve dhe dëshmon forcën e Nënës. Shtëpia e familjes Qerkezi dëshmon gjenocidin dhe spastrimin etnik të Serbisë në Kosovë.”, ka shkruar Kurti.

“Nga aty, 25 vite më parë, forcat policore të Serbisë ia rrëmbyen dhe zhdukën të katër djemtë: Artanin, Armendin, Ardianin e Edmondin, si dhe bashkëshortin Halimin. Nga ajo shtëpi u rrëmbyen edhe Vegim Qerkezi, Shpejtim Ymeraga, Skender e Myrteza Dylhasi, dhe Shpend e Fatos Jetishi.”, shkroi mes të tjerash kryeministri.

Po ashtu ai kujtoi edhe 25 vjetorin e masakrës në lagjen “Dardania” në Pejë, ku siç tha ai, forcat e armatosura serbe masakruan 40 civilë shqiptarë.

“Ne i kujtojmë çdoherë e nuk do t’i harrojmë kurrë. Në këtë 25 vjetor i përkujtojmë edhe 75 të vrarët në masakrën në Klladernicë të Skënderajt, 18 të vrarët në Mamushë, dhe 10 anëtarët e familjes Rama të vrarë në Obiliq. Sot, në Fushë Kosovë përkujtohen 168 shqiptarët e vrarë nga forcat e armatosura serbe.”, tha mes të tjerash ai.

“Me mall e dhembje, i kujtojmë sot dhe ҫdo ditë, të gjithë të vrarët dhe të zhdukurit me dhunë nga Serbia. Sakrifica e popullit tonë është themeli i Republikës sonë të lirë.”, u shpreh kryeministri.

“Lavdi të gjithë të rënëve në rrugën e gjatë për ҫlirimin e Kosovës!”, përfundoi ai.

Rruga Press