Kurti: Kosova ndër 30 vendet më të sigurta në botë për investime, e para në rajon sipas Indeksit Global të Qëndrueshmërisë

Kryeministri i Kosovës, Albin Kurti, ka theksuar se vendi është renditur ndër shtetet më të sigurta në botë për investime, duke u pozicionuar në vendin e 26-të nga 226 shtete sipas Indeksit Global të Rrezikut dhe Qëndrueshmërisë së Investimeve, publikuar nga organizata Henley.

Kurti u shpreh se Kosova është e para në rajon dhe më përpara se disa shtete anëtare të Bashkimit Evropian në këtë indeks, gjë që dëshmon përparimin ekonomik dhe forcimin e sundimit të ligjit në vend.

Sipas tij, ky vlerësim pason heqjen e Kosovës nga lista e “Shteteve në Situata të Brishta dhe Konflikti” nga Fondi Monetar Ndërkombëtar (FMN), si dhe konstatimin e këtij institucioni se Kosova do të ketë rritjen ekonomike më të lartë në rajon për këtë vit.

“Kosova si vend i sigurt për të investuar është rezultat i punës sonë për forcimin e institucioneve, përmirësimin e klimës së biznesit dhe ofrimin e kushteve të favorshme për investime të qëndrueshme,” ka shkruar Kurti, duke theksuar se shteti po vazhdon të forcohet pavarësisht sfidave globale.

Rruga Press