Kurti falënderon Sarrazinin për vizitën e shpejtë pas sulmit terrorist të djeshëm në veri

Kryeministri i Republikës së Kosovës, Albin Kurti gjatë të hënës së 25 shtatorit është takuar me emisarin gjerman për Ballkanin Perëndimor, Manuel Sarrazin.

Kurti e ka falenderuar Sarrazin për vizitën e shpejtë pas sulmit të djeshëm në veri.

“Faleminderit, Manuel Sarrazin, Përfaqësues Special i Gjermanisë për Ballkanin Perëndimor, për vizitën tuaj të shpejtë pas sulmeve terroriste të djeshme në territorin tonë. Mbështetja e Gjermanisë dhe aleatëve tanë të tjerë, ndërsa ne e kalojmë me siguri këtë periudhë, është një mbështetje e fortë e demokracisë dhe shtetit të së drejtës”, ka shkruar Kurti në rrjetin social “X”.

Thank you, @ManuelSarrazin, German Special Representative for the WB6, for your prompt visit following yesterday's terrorist attacks on our territory. The support of 🇩🇪 and our other allies, as we securely navigate this period, is a strong endorsement of democracy & rule of law. pic.twitter.com/Do3dhQ2lKB

— Albin Kurti (@albinkurti) September 25, 2023

Sipas Zyrës së Kryeministrit tema qendrore e takimit ishte sulmi terrorist i djeshëm ndaj Policisë së Kosovës, nga i cili u vra në krye të detyrës, rreshteri, Afrim Bunjaku.

Kryeministri Kurti e ka njoftuar emisarin gjerman, Sarrazin me informacionet më të fundit në lidhje me sulmin e djeshëm dhe veprimet e institucioneve të sigurisë për garantimin e integritetit territorial, sigurisë, ligjshmërisë dhe kushtetutshmërisë.

Emisari Sarrazin shprehu ngushëllimet e tij për familjen e të ndjerit dhe popullin e Kosovës, e dënoi sulmin e djeshëm duke e cilësuar atë si kriminal dhe terrorist mbi Policinë e Kosovës, dhe dha mbështetjen e Gjermanisë ndaj Kosovës.

Ai gjithashtu e përgëzoi Kryeministrin për qasjen e matur dhe menaxhimin e kujdesshëm të situatës. Kryeministri falënderoi emisarin Sarrazin për vizitën e menjëhershme dhe për mbështetjen e Gjermanisë.

Rruga Press