Kuleba: Trump nuk mund të bëjë marrëveshje paqeje me Rusinë për Ukrainën

Ish-ministri i Jashtëm ukrainas, Dmytro Kuleba nuk është i bindur se presidenti i sapozgjedhur i SHBA-së, Donald Trump, do të jetë në gjendje të ndërmjetësojë një marrëveshje paqeje.

Në një intervistë të gjerë dhe pesimiste me Politico, ai këmbënguli se presidenti rus, Vladimir Putin nuk është i gatshëm që të bëjë një marrëveshje ndërsa presidenti i ri amerikan, në vend të kësaj rrezikon rrëzimin e vijës së parë të frontit të ukrainasve nëse administrata e re amerikane nuk e furnizon me armë Kievin.

Kuleba gjithashtu vuri në pikëpyetje vendosmërinë e partnerëve perëndimorë të Ukrainës, veçanërisht Gjermanisë, e cila është në pritje të zgjedhjeve të parakohshme, dhe u ankua se ndërsa Rusia ka qenë në gjendje të gjejë aleatë të tillë si Koreja e Veriut për të dërguar trupa, aleatët e Kievit kanë qenë të paqëndrueshëm dhe jo të besueshëm në mbështetjen e tyre të armëve.

Sa i përket premtimit të Trumpit për një marrëveshje të shpejtë për t’i dhënë fund luftës, Kuleba, i cili u largua nga detyra në muajin shtator, tha se nuk e sheh të arsyeshme të pajtohet me Putinin.

“Putini ende beson se mund të mbysë shtetësinë e Ukrainës dhe ta thyejë Ukrainën si një demokraci e pavarur dhe ai mendon se është një hap larg ekspozimit të Perëndimit si të dobët”, tha ai duke shtuar “Ukraina është një obsesion personal për Putinin, por shkatërrimi i Ukrainës është gjithashtu një mjet për qëllimin e tij më të madh – t’u tregojë të gjithë botës se Perëndimi nuk është në gjendje të mbrojë veten ose atë që përfaqëson”.

Ndryshe, Rusia ka nisur pushtimin e shtetit ukrainas më 24 shkurt të vitit 2022 duke shkaktuar mijëra viktima dhe dëme të shumta materiale.

Rruga Press