Kryeziu: Letra dërguar SHBA-së e BE-së ka filluar të ketë impakt
Letra e dërguar shefit të diplomacisë të bllokut evropian, Josep Borrell, kryediplomatit amerikan, Antony Blinken dhe atij britanik James Cleverly, nga politikanë nga Evropa e SHBA-ja, duke kërkuar një distancim nga pala serbe, veçse ka filluar të ketë ndikimin e saj, ka vlerësuar deputetja nga radhët e Lëvizjes Vetëvendosje, Arbëreshë Kryeziu-Hyseni.
Në një lidhje direkte në “FIVE” të RTV Dukagjini, kjo e fundit ka vlerësuar se letra e dërguar SHBA-së e BE-së tregon se Kosova ishte në një rrugë të duhur.
“Mendoj se ka qenë një kthesë jashtëzakonisht shumë e madhe e zhvillimeve që së fundmi janë lidhur me çështjen e dialogut dhe pikërisht me qasjen që ka kohë që e themi se ka qenë e pabarabartë ndaj Republikës së Kosovës, pra për gjithçka që lidhet me zhvillimet për dialogun dhe vetadresimi i një numri të kryetarëve të komisioneve për politikë të jashtme, përfshirë edhe deputetë të ndryshëm, të cilët i janë bashkëngjitur kësaj shkrese, tregon që ne kemi qenë në rrugën e duhur, kemi bërë veprimet e duhura dhe duke bërë thirrjet e duhura për çka ndoshta jo shumë herë kemi pasur përkrahjen edhe të aspekteve të tjera të politikës në vendin tonë”, ka deklaruar Kryeziu.
“Unë besoj që veçse ka filluar të ketë impaktin e vet, sepse nënshkrues dhe iniciues të kësaj deklarate të përbashkët janë persona të cilët kanë ndikim të jashtëzakonshëm në politikën e jashtme dhe jo vetëm të BE-së, por të shteteve përtej… është një numër i nënshkruesve që kanë ndikim shumë të madh në politikëne jashtme. Kjo shkresë ka qenë një ftesë e nevojshme dhe shumë e rëndësishme për Kosovën për çka unë i jam falënderues secilit prej tyre”.
Tutje, deputetja Kryeziu-Hyseni ka thënë se dërgimi i kësaj letre erdhi në një moment të duhur, duke i paraprirë rinisjes së procesit të dialogut Kosovë-Serbi në shtator. E njëjta theksoi se tashmë masat ndëshkuese ndaj Kosovës do të duhej të largoheshin.
“Mendoj që ky ka qenë një mendim dhe veprim i jashtëzakonshëm i gjithë këtyre nënshkruesve dhe iniciuesve të kësaj deklarate të përbashkët që vjen në një kohë të rëndësishme për vendin tonë, sepse siç e dimë, prej shtatorit pritet t’i kthehemi dialogut…”, ka deklaruar Kryeziu gjersa ka theksuar se “Gjithmonë kam menduar se ka qenë e padrejtë fakti që na janë vendosur masa, me ç’rast tani nuk ka asnjë kuptim që nuk do të jenë në fuqi. Shpresoj që BE do të gjejë momentin e duhur t’i heqë ato”.
Më 7 gusht, një letër iu dërgua shefit të diplomacisë të bllokut evropian, Josep Borrell, kryediplomatit amerikan, Antony Blinken dhe atij britanik James Cleverly, nga politikanë nga Evropa e SHBA-ja, duke kërkuar një distancim nga pala serbe.
Siç raporton Tagesspiegel, politikanët e huaj kanë kërkuar nga BE-ja e SHBA-ja më shumë distancë nga Serbia dhe të merren më në mënyrë kritike me presidentin serb, Aleksandër Vuçiq.
Letra u mirëprit edhe nga ana e kryeministrit Albin Kurti. Ai falënderoi të gjithë politikanët pjesëmarrës.
Rruga Press