Kryeministri polak viziton kufirin me Bjellorusinë, akuzon Putin: Është ai arkitekti
Situata në kufirin mes Polonisë dhe Bjellorusisë vijon të jetë e tensionuar, me refugjatët nga Lindja e Mesme dhe Afrika që tentojnë të kalojnë kufirin për të hyrë në territorin e BE-së.
Në orët e fundit, efektivët e gardës kufitare polake ndaluan një grup refugjatësh që ishin arratisur nga një kamp në një zonë pyjore dhe i çuan ata në një qendër burgimi.
Më herët gjatë ditës, kryeministri polak Mateusz Morawiecki vizitoi zonën kufitare, prej nga akuzoi presidentin rus Vladimir Putin si arkitekt të krizës migratore.
“Lukashenko është vetëm ekzekutori i mësymjes së fundit, por kjo mësymje ka një sponsor që gjendet në Moskë dhe ky person është presidenti Putin,” – deklaroi Morawiecki.
Nga ana e tyre, presidentët Putin dhe Lukashenko diskutuan në një bisedë telefonike lidhur me situatën në kufi.
Zëdhënësi i Kremlinit, Dmitri Peskov, që konfirmoi bisedën e zhvilluar deklaroi se Moska po i ndjek zhvillimet e fundit me shumë vëmendje.
Lidhur me episodet e verifikuara reagoi edhe Komisioni Evropian, që akuzoi regjimin bjellorus për sjellje gangsterësh.
Në kufirin mes dy vendeve ndodhen rreth 2 mijë emigrantë. Nga ana e tij, Minsku zyrtar e cilësoi si “shqetësuese” praninë e forcave polake të sigurisë dhe mohoi sërish orkestrimin e krizës së emigrantëve.
LEXO EDHE:
Rruga Press