Mbështetje në investime për energji të pastër – Kurti: Masat që po lansohen stimulojnë rritjen ekonomike

Ministria e Ekonomisë ka lansuar thirrjen publike për mbështetjen e konsumatorëve familjarë dhe NMV-së për investime në sisteme të energjisë së ripërtërishme.

Kryeministri Albin Kurti ka thënë se përmes masave që janë zbatuar deri tani e atyre që po lansohen, stimulohet edhe rritja ekonomike.

Sipas tij, përmes politikave të tilla synohet një sektor më i qëndrueshëm i energjisë.

“Masat që po i lansojmë sot dhe ato që i kemi zbatuar deri tani, janë të përkrahura nga Bashkimi Evropian dhe janë në përputhje të plotë me qëllimet tona afatgjate për sektorin e energjetikës. Kosova qëndron krahas shteteve evropiane në zhvillimin e politikave që e synojnë një sektor të energjisë që është edhe i qëndrueshëm edhe i pastër, e që gjithmonë e ka në qendër qytetarin”, ka theksuar Kurti.

Ndërsa, ministrja e Ekonomisë, Artane Rizvanolli ka thënë se me lansimin e këtyre masave do të ulen shpenzimet e energjisë.

“Ne si ministri kemi përgatitur dhe miratuar në lexim të parë Ligjin për Burime të Ripërtërishme të Energjisë i cili do ta bëjë më atraktiv vendosjen e sistemeve solare nga konsumatorët. Përfitimet që qytetarët, bizneset e vendi ynë kanë nga investime të tilla janë të shumëfishta, duke filluar nga efiqienca e energjisë, ulja e ndotjes e faturat e energjisë. Ne kemi arritur të mobilizojmë të gjitha burimet që kemi në vend për të dizajnuar masa që kanë ndikim te qytetarët. Masa të cilat mund të zbatohen në mënyrë të plotë, transparent edhe të drejtë”, ka deklaruar Rizvanolli.

Përmes këtij investimi në sistemin e energjisë së ripërtërishme mundësohet investimet në sistemin fotovoltaik (FV) për prodhimin e energjisë elektrike për vetë-konsum dhe të sistemit diellor për ngrohjen e ujit sanitar të financuara nga Bashkimi Evropian (BE). 

Rruga Press