Kryeministri i Luksemburgut: Duhet t’i japim Ukrainës mjetet për të përballuar luftën

Kryeministri i Luksemburgut, Luc Frieden, në mbledhjen e kësaj të enjte në Bruksel tha se duhet t’i jepnin Ukrainës mjetet për të mbijetuar këtë luftë dhe se kufijtë nuk mund të ndryshohen me forcë.

Edhe ditën e premte do të vijojë diskutimi për çështjet më urgjente që duhet të zgjidhen para fundit të vitit, përfshirë mënyrën e financimit të Ukrainës nga fillimi i vitit 2026.

Ekzistojnë dy mundësi kryesore që po shqyrtohen për të rritur pjesën prej 90 miliardë eurosh të BE-së për të financuar Ukrainën gjatë dy viteve të ardhshme.

Opsioni i parë është përdorimi i aseteve të ngrira të Bankës Qendrore Ruse për të krijuar një kredi me interes zero për Ukrainën, të cilën Kievi do ta shlyejë vetëm nëse Rusia më vonë paguan dëmshpërblimet e luftës.

E dyta do të përfshinte huazimin e përbashkët të parave nga BE-ja në tregjet financiare, ngjashëm me qasjen e përdorur gjatë pandemisë COVID-19.

“Do të gjejmë një zgjidhje, kemi dy mundësi në tryezë”, tha Frieden. Përdorimi i aseteve të ngrira, tha kryeministri, është “kompleks, por mund të gjejmë një mënyrë për ta bërë të funksionojë”.

Në BE ka 210 miliardë euro asete sovrane ruse, nga të cilat 185 miliardë euro mbahen në Euroclear, një depozitë me seli në Bruksel.

Belgjika ka kërkuar që shtetet e tjera anëtare të ofrojnë garanci të forta.

“Duhet të gjejmë një grup vendesh që ndajnë rreziqet” në skenarin në të cilin Rusia nis një padi gjyqësore për të kërkuar asetet në fund të luftës ose pasi të hiqen sanksionet. Ne duhet të jemi të bashkuar sepse SHBA-të mund të mos jenë aty me ne në të ardhmen”, tha kryeministri i Luksemburgut.

Rruga Press