Kryeministri britanik: Angazhimi ynë ndaj Ukrainës është i pathyeshëm! Nuk mund t’i besojmë Putinit

Kryeministri i Mbretërisë së Bashkuar, Keir Starmer, ka deklaruar se aleatët ndërkombëtarë janë të bashkuar në një “angazhim të pathyeshëm” për të mbështetur Ukrainën, ndërsa ka akuzuar presidentin rus Vladimir Putin se po e zvarrit me qëllim procesin e paqes.

Duke folur gjatë një takimi të zhvilluar nga grupi diplomatik “Aleanca e të Gatshmëve”, Starmer tha se është e qartë që Kremlini nuk është i interesuar për zgjidhje, por po vazhdon sulmet agresive ndaj Ukrainës.

“Putini nuk është i besueshëm. Ai po vonon me qëllim çdo përpjekje për paqe, ndërsa urdhëron bombardime të reja ndaj Ukrainës,” – u shpreh kryeministri britanik nga Glasgou, ku mori pjesë në bisedimet ndërkombëtare.

Një zëdhënës i Downing Street konfirmoi se vlerësimi i Starmer u mbështet edhe nga ngjarjet e fundit në terren, veçanërisht sulmet e fundit në Kiev, të cilat kanë shkaktuar dëme të konsiderueshme në ndërtesat e organizatave perëndimore.

“Kjo u nënvizua më tej nga sulmet pa dallim në Kiev javën e kaluar, të cilat dëmtuan ndërtesat e Këshillit Britanik dhe delegacionit të Bashkimit Europian”, tha zëdhënësja.

Starmer vlerësoi gjithashtu lajmet e fundit që disa partnerë ndërkombëtarë të Ukrainës kanë vendosur të furnizojnë Kievin me raketa me rreze të gjatë veprimi, për të përmirësuar aftësitë mbrojtëse dhe ndëshkuese të forcave të saj.

Në fjalën e tij, ai theksoi se aleanca – me mbështetjen edhe të Presidentit Donald Trump – duhet të shtojë presionin ndaj Putinit për të arritur një armëpushim të qëndrueshëm.

“Ekipi ynë është i palëkundur në këtë angazhim, por tani duhet të shkojmë edhe më tej për të ushtruar presion real mbi Rusinë”, – tha Starmer.

Rruga Press