Kryeministrat e Spanjës dhe Danimarkës mbërrijnë në Kiev për t’u takuar me Zelensky-in

Kryeministrat e Spanjës dhe Danimarkës mbërritën në Kiev të enjten për t’u takuar me presidentin ukrainas Volodymyr Zelensky, thanë zyrat e tyre përkatëse.

Pas mbërritjes në kryeqytetin ukrainas, kryeministri spanjoll Pedro Sanchez dhe kryeministrja daneze Mette Frederiksen u shfaqën së bashku në një video të shkurtër të postuar në Twitter nga llogaria zyrtare e Sanchez.

“Ukraina ka mbështetjen, solidaritetin dhe angazhimin e Spanjës”, thuhet në postim.

Zyra e Frederiksen shkroi në Twitter se ajo dhe Sanchez “do të takoheshin me Presidentin Zelensky për të ofruar mbështetje konkrete për Ukrainën”.

“Ata do të takohen për të diskutuar situatën aktuale në Ukrainë, mbështetjen e mëtejshme për ukrainasit dhe ndjekjen penale të krimeve të luftës dhe shkeljeve të të drejtave të njeriut në lidhje me pushtimin rus”, tha zyra e Frederiksen në një deklaratë.

Rusia ka mohuar akuzat për krime lufte dhe pretendon se forcat e saj nuk synojnë civilët, por gazetarët e CNN në terren në Ukrainë kanë parë prova të dorës së parë të mizorive në vende të shumta në të gjithë vendin.

Sanchez njoftoi në fillim të kësaj jave se Spanja do të rihapë ambasadën e saj në Kiev në ditët në vijim, të cilën e kishte mbyllur menjëherë pas pushtimit rus të Ukrainës në fund të shkurtit.

Rruga Press