Kosova kandidate serioze për organizimin e Lojërave Mesdhetare 2030

Ministri i Kulturës, Rinisë e Sportit, Hajrulla Çeku, komunikoi përmes rrjeteve sociale se, po punohet me përkushtim të plotë që në Kosovë të organizohet një prej ngjarjeve më të mëdha sportive në botë, Lojrat Mesdhetare.

Programi i Lojërave Mesdhetare përmban 24 sporte dhe pjesëmarrje të rreth 5000 sportistëve.

“Tashmë jemi një hap para. Sot në vendin tonë filloi vizitën Komisioni Vlerësues i Komitetit Ndërkombëtar të Lojërave Mesdhetare, kryesuar nga presidenti Julian Pace Bonello dhe shoqeruar nga sekretari i përgjithshëm i ICMG-së, Iakovos Filippousis”, shkruan ministri Çeku.

Pritet që komisioni të bëjë vlerësim të gjendjes ndërsa autoritetet zhvillojnë takime me zyrtarë të nivelit të lartë institucional për ta konfirmuar mbështetjen e tyre për Lojërat Mesdhetare.

Por çfarë përfiton Kosova me organizimin e Lojërave Mesdhetare? Ministri Çeku në postimin e tij ka renditur një sërë pikash pozitive si vijojnë:

∙ Konsolidim të imazhit shtetëror në arenën ndërkombëtare

∙ Përforcim të përkatësisë dhe identitetit shtetëror

∙ Infrastrukturë fizike të modernizuar

 Ekonomi të ringjallur përmes krijimit të vendeve të reja të punës dhe zhvillimit të turizimit sportiv

∙ Fuqizim të rezultateve sportive dhe zhvillim të qëndrueshëm të sportit në vend.

Rruga Press