Konjufca: BE-ja nuk ka kompetencë t’i propozojë Kosovës draft për Asociacionin

Kryeparlamentari Glauk Konjufca ka thënë se nuk është kompetencë e Bashkimit Evropian që t’i propozojë Kosovës draft për Asociacionin e komunave me shumicë serbe. Sipas tij, Kosova nuk duhet të qëndrojë “gatitu” që vetëm ta presë të gatshëm draftin për ta dërguar në Gjykatë Kushtetuese.

Konjufca ka theksuar se Qeveria e Kosovës është më shumë e rezervuar, prandaj pret nënshkrimin e marrëveshjes me Serbinë – rrjedhimisht sigurinë se Serbia do t’i respektojë të gjitha pikat e marrëveshjes. Ai ka thënë se kur Serbia pretendon se mund të zbatojë “vetëm atë që i konvenon asaj nga Marrëveshja e Ohrit”, edhe Kosova ka të drejtë të zbatojë atë që i konvenon.

Sipas Konjufcës, dilema e madhe e Qeverisë së Kosovës është nëse Serbia do t’i zbatojë të gjitha pikat. E, nëse Serbia merr nga tavolina vetëm atë që i pëlqen, Konjufca ka deklaruar se “edhe ne do të marrim nga ajo vetëm çka na pëlqen. Asociacioni nëse nuk na pëlqen, nuk do ta marrim”.

“BE-ja nuk e ka kompetencë t’i propozojë asociacion Kosovës. Është gabim të mendohet se është kompetencë e BE-së neve veç me na caktu, e kompetencë e jona veç me dërgu në Kushtetuese. Ndoshta Hovenier e ka pasur fjalën që Kosova ta propozojë një draft… Unë nuk mendoj që është kompetencë e BE-së me i propozu draft Kosovës. Nuk mendoj që Kosova duhet të qëndrojë gatitu dhe veç me çu draftin që BE-ja e propozon. Nuk pajtohem me këtë procedurë, nuk shkruan askund, nuk është obligative për Kosovën. Obligative është vetëm marrëveshja e vitit 2013. Jemi në fazë krejt të re. Ne po presim që të nënshkruhet marrëveshja e Ohrit. E marrëveshja është pika e 7 edhe pse nuk përmendët por mund të kuptohet që ka lidhje me Asociacionin”, ka thënë Konjufca duke përfunduar se nëse marrëveshja është obligative 100% “nuk do të ketë qare pa e zbatu secili”.

Të enjten në një takim me gazetarë, Ambasadori amerikan në Kosovë, Jeffrey Hovenier, e ka këshilluar Qeverinë e Kosovës që të kërkojë sa më shpejt mendimin e Gjykatës Kushtetuese për një draft-statut të hartuar prej Perëndimit për themelim të Asociacionit të komunave me shumicë serbe.

Diplomatët perëndimorë në tetor i patën paraqitur Kosovës dhe Serbisë një draft-statut për formimin e Asociacionit – në parim të dyja palët e patën pranuar.

Rruga Press