Kësaj radhe nuk ka dyshime: Ushtarët e Putinit po sillen si nazistë
Përballë masakrës në Bucha, ku banorëve u janë lidhur duart prapa shpine e janë vrarë me një plumb në kokë, ndërsa trupat e tyre janë shpërndarë në rrugët kryesore të qytetit, ne mendojmë për Katynin në Poloni.
Për një Srebrenicë nga plumbat.
Për masakrën e Reçakut në Kosovë, e cila në vitin 1999 ndezi alarmin që çoi në ndërhyrjen e NATO-s kundër Serbisë.
Dhe mendojmë sigurisht për Oradour-sur-Glanen, këtë fshat në mes të Francës, ku një batalion i SS Das Reich, duke e ndier se humbja është afër dhe duke marrë një urdhër për të lëvizur në drejtim të frontit të Normandisë, ekzekutuan, përpara se të pastronin gjurmët, 643 burra, gra dhe fëmijë.
Është gjithmonë e njëjta histori.
Një ushtri poshtërohet nga një rezistencë popullore.
Ajo nuk mund të realizojë planet, në mënyrë të rregullt, duke bërë një luftë normale, sipas ligjeve të luftës dhe konventave.
Ajo hakmerret ndaj civilëve.
Ndëshkon gratë dhe fëmijët.
Dhe, siç ka thënë shkrimtari George Bernanos, duke folur për Luftën Civile të Spanjës dhe abuzimet e kryera nga milicë fashistë të gjeneralit Franco, ajo vret siç pret një njeri dru.
Këtë herë nuk ka dyshim.
Burrat që bënë këtë vepruan si nazistët.
Ata nuk janë më ushtarë; ata janë grup kriminelësh.
Kjo nuk është më një ushtri; këta janë frikacakë dhe vrasës gjakftohtë.
Dhe kjo më nuk është luftë; është kasaphane.
Rruga Press