Karburanti iu merr shqiptarëve çerekun e pagës

Nga Adi Darsi

Rritja e çmimit të karburanteve në javët e fundit është një goditje rrënuese për atë që mund të quhet shtresa e mesme në Shqipëri. Ndryshe nga të gjithë vendet e tjera të rajonit apo të botës, përdoruesit e automjeteve në vendin tonë , me çmimet aktuale të karburanteve, duhet të paguajnë çerekun e pagës, nëse duan ta mbajnë mjetin në punë.

Bazuar në të dhënat e pagës mestare për secilin nga vendet e rajonit dhe nga çmimi përkatës i karburantët, mbi të cilat janë bërë përllogaritjet, rezulton se shqiptarët e paguajnë dyfish e në mos më shtrenjtë për furnizimin e automjetit të tyre.

Kjo është e pritshme kur dihet që paga mesatare në Shqipëri në periudhën 2020-2021, ka qenë më e ulta e rajonit, 436 euro, ndërkohë që më të lartën e ka Mali i Zi, 787 euro.

Veç pagës mesatare më të ulët, Shqipëria ka edhe çmimin më të lartë të karburanteve në rajon. Për efekt krahasimi edhe me vendet e tjera morëm si tregues një litër benzinë – por ai nuk ndryshon as për naftën. Kështu për shembull, më 14 mars një litër benzinë 95 oct në vendin tonë ishte 1.80 euro. Çmimin më të lirë e ka Maqedonia e Veriut (ku qeveria ndërhyri fort), vetëm 1.40 euro për litër.

Duke marrë si një mesatare mujore konsum të karburantit prej 60 litrash në muaj, (ky është një tregues i përdorur në vendet e BE dhe më gjerë), rezulton që nga paga e tyre, konsumatorët shqiptarë të karburanteve duhet të lenë në muaj 108 euro.

E shprehur si përqindje 24,8 për qind të pagës. Në këtë tregues na ndjek Kosova, ku konsumatorët duhet të paguajnë 17,7 për qind të pagës, ndërkohë të gjithë vendet e tjera të rajonit paguajnë sa gjysma e konsumatorëve të Shqipërisë. Treguesin më të mirë e kanë serbët, vetëm 11,2 për qind të pagës.

Për të vijuar krahasimin vlen të thuhet se më 8 mars kur nafta kapi nivelet rekord në bursa, konsumatorët e Greqisë u alarmuan sepse panë që me çmimet e vendosura në tabelat e karburanteve do të duhej të paguanin 5.58 për qind të pagës së tyre mujore, niveli më i lartë për vendet e BE. Por nëse grekët më 8 mars, në kulmin e çmimit të shtrenjtë paguanin 5.58 për qind të pagës mesatare, treguesi i mësipërm për Mbretërinë e Bashkuar ishte vetëm 3.11 për qind, për Gjermaninë 2.92 për qind dhe në SHBA vetëm 1.22 për qind të pagës.

Karburantet janë shtrenjtuar kudo në botë, por shqiptarët po e paguajnë më shtrenjtë se kudo në botë!

KARBURANTET SI PESHË NË PAGË, KRAHASIMI ME RAJONIN

(të dhënat janë të gjitha në euro)

Burimi: Open Data Albania, GlobalPetrolPrice.com

Rruga Press