Kandidati i VV-së në Viti: Për fëmijën e parë 100, të dytin 200 dhe të tretin 500 euro

Kushte më të mira për gratë dhe vajzat e Vitisë u premtua gjatë tubimit të Lëvizjes Vetëvendosje në këtë komunë, ku u prezantua programi i kandidatit për kryetar, Arsim Ademi.

Ademi tha se, roli i gruas në shoqëri është i pazëvendësueshëm dhe si Lëvizje tha se kanë vëmendje të veçantë ndaj grave.

“Roli i tyre është i pazëvendësueshëm dhe ne kemi borxh ndaj tyre. Si Lëvizje kemi vëmendje të veçantë ndaj grave. Si Lëvizje kemi borxh të madh ndaj grave, dhe pa mbështetjen e tyre nuk do të ishim ne qeverisje qendrore e as lokale. Çerdhet do të shtohen në Viti, synojmë të shtojmë 5 çerdhe që të ndihmojmë gratë të vazhdojnë punën duke mos pas obligim të merren me fëmijët. Nënave qe nuk punojnë të kenë mundësi të dërgojnë fëmijët ne çerdhe, lirimin e pagesave për nënat vetushqyese.”

Ademi, premtoi mësim tërë ditor që nënat të kenë mundësi të punojnë lirshëm, për çka tha se do të nisë me pilotimin e disa shkollave.

Kandidati për kryetar premtoi testime falas për kancerin e gjirit dhe qafës së mitrës si dhe subvencionim për nënat e reja me 100 euro për fëmijën e parë, 200 euro për të dytin dhe  500 euro për fëmijën e tretë.

Bartësja e listës së Vetëvendosjes për Kuvendin Komunal, Majlinda Shabani kërkoi mbështetje nga gratë në zgjedhjet e 12 tetori, duke u premtuar se do të jetë zëri i tyre.

“Premtoj se do të jem zëri juaj për zhvillim e barazi. Ju jeni forca ime”, tha Shabani.

Vetëvendosje në Viti garon me listën me 30 kandidatë për këshilltarë komunal.

Rruga Press