Kamberi: Raporti për Serbinë është thirrje për respektimin e të drejtave të shqiptarëve në Luginë

Shaip Kamberi, deputeti i vetëm shqiptar në Parlamentin e Serbisë, ka thënë se Raporti i Progresit për Serbinë për këtë vit është thirrje për drejtësi dhe barazi për shqiptarët e Luginës së Preshevës. 

Ai ka shtuar se ai raport është pasqyrë e situatës së pakicave, veçanërisht mbi sfidat dhe problemet që përballen shqiptarët e Luginës. 

Kamberi ka renditur disa nga pikat që thotë se janë në raport e shqiptarët i kanë ngritur vazhdimisht. Aty përfshin mungesën e zbatimit të të drejtave të shqiptarëve, pasivizimin e adresave dhe kontrollet policore, përfaqësimin e pamjaftueshëm të shqiptarëve në institucione publike dhe polici, mungesa e arsimit në gjuhën shqipe, mungesa e shërbimeve publike në gjuhën e pakicave, gjuha e urrejtjes dhe diskriminimi, etj. 

“Ky raport nuk mund të kuptohet ndryshe përveç si thirrje që Serbia të përmbushë detyrimet ndaj shqiptarëve në Luginën e Preshevës, të drejtave e pakicave, të veprojë në mënyrë transparente dhe të respektojë të drejtat e shqiptarëve si qytetarë të barabartë. Ne nuk do të heshtim! Të drejtat tona duhet të mbrohen, dhe zëri ynë do të dëgjohet”, ka shkruar Kamberi në Facebook.

Rruga Press