Japonia:Duam një botë pa bomba bërthamore/Tragjedi të tilla nuk duhet të ndodhin kurrë më

Kryeministri japonez Yoshihide Suga mori pjesë në një memorial që përkujton 76 vjetorin e bombardimit atomik të Hiroshimës dhe Nagasakit.

Të mbijetuarit dhe të afërmit shënuan përvjetorin e shpërthimit me një minutë heshtje; shumë prej atyre që i mbijetuan sulmeve vazhdojnë të kërkojnë ndihmë sociale dhe kujdes mjekësor.

6 gusht 1945

Shtetet e Bashkuara hodhën bombën e parë bërthamore në botë të përdorur kundër civilëve në 08:15 sipas kohës lokale në qytetin jugperëndimor të Hiroshimës.

Bomba e quajtur “Little Boy” shkatërroi qytetin dhe vrau menjëherë 80,000 civilë, të cilët përbënin rreth 30% të popullsisë në atë kohë.

Deri në fund të vitit u vlerësua se kishin vdekur 140,000 njerëz dhe mijëra të tjerë  ndoqën trajtime mjekësore në vitet në vijim për shkak të dëmtimeve të lidhura me rrezatimin.

Tre ditë më vonë, më 9 gusht, SHBA-ja hodhi një bombë të dytë në Nagasaki. Bomba atomike me emrin “Fat Man” vrau 74,000 njerëz të tjerë dhe më shumë se 40% e qytetit u shkatërrua.

Gjashtë ditë, pas bombardimit, Japonia u dorëzua duke shënuar fundin e Luftës së Dytë Botërore.

Kërkohet heqja totale e armëve bërthamore

Gjatë përkujtimit kryeministri Suga tha se qeveria do të vazhdojë të mbështesë të mbijetuarit, ndërsa kryetari i bashkisë së Hiroshimës kërkoi nga të gjitha kombet që të “punojnë së bashku” për të promovuar “heqjen totale” të armëve bërthamore.

Sekretari i Përgjithshëm i OKB-së António Guterres premtoi se Kombet e Bashkuara do të vazhdojnë të jenë plotësisht të përkushtuara ndaj qëllimit të një bote pa armë bërthamore, duke thënë se “një tragjedi e tillë nuk duhet të ndodhë kurrë më”.

©RrugaPress