Ish-Këshilltari i Sigurisë në SHBA paralajmëron krizë globale: Trump Admiron Putinin dhe Kim Jong Un

John Bolton, ambasadori i SHBA-së në Kombet e Bashkuara që shërbeu si këshilltar i Trump për sigurinë kombëtare nga prilli 2018 deri në shtator 2019, ka paralajmëruar mundësinë e një krize të madhe ndërkombëtare, që sipas tij, po rritet ndjeshëm në mandatin e dytë të Donald Trump, për shkak të “paaftësisë së tij për t’u fokusuar” në formimin e politikës së jashtme.

Sipas mediave të huaja, duke u mbështetur në përvojën e tij deri tani si këshilltar i Trumpit për sigurinë kombëtare, Bolton shpalosi shqetësimet e tij për mandatin e ardhshëm të Presidentit të zgjedhur, duke u fokusuar në dobësitë dhe qasjen e tij ndaj politikës së jashtme.

John Bolton vuri në dukje se vendimmarrja e Trump karakterizohet nga marrëdhëniet personale dhe reagimet e momentit në vend se një kuptim i thellë i interesave dhe strategjisë kombëtare. “Nuk ka asnjë filozofi, asnjë strategji të sigurisë kombëtare. Vendimet e tij janë si një arkipelag pikash që nuk janë të lidhura me njëra-tjetrën”, tha ai në mënyrë karakteristike, raporton Guardian.

Bolton argumentoi se këshilltarët e Trump po përpiqeshin të krijonin një politikë koherente përmes vendimeve të drejta individuale, por vetë presidentit i mungonte aftësia për të parë pamjen më të gjerë.

“Ai nuk i kupton të dhënat ose nuk i konsideron të rëndësishme informacionet që i janë dhënë në konferencat ditore të sigurisë kombëtare. Ai beson se mund të zgjidhë çdo problem përmes marrëdhënieve personale dhe marrëveshjeve, gjë që është e rrezikshme”, tha ai.

Bolton shpreh shqetësimin për qasjen e Trump ndaj liderëve autoritarë si Vladimir Putin, Kim Jong-un dhe Xi Jinping.

“Trump mendon se është në marrëdhënie miqësore me Putinin, por ai nuk e kupton që Putini e sheh atë si pre e lehtë. Kjo është një mungesë serioze e ndërgjegjësimit të situatës”, tha ai.

Ish-këshilltari tha se Trump i admiron liderët autoritarë sepse ata nuk përballen me kufizimet e vendosura nga sistemet kushtetuese të qeverisjes.

“Ai dëshiron të jetë një ‘burrë i madh’ si ata. Ai dëshiron të ketë lirinë për të marrë vendime pa u kufizuar nga parlamentet apo gjykatat”, tha ai

Rruga Press