I dënuar me burg përjetë për trafik droge, El Chapo përballet me një akuzë të re

Joaquín “El Chapo” Guzmán nuk ishte vetëm një prej trafikantëve më të mëdhenj të drogës, para se të arrestohej dhe të dënohej me burgim të përjetshëm në SHBA, por edhe i martuar njëkohësisht me dy gra. Akuza për bigami bëhet nga gazetarja meksikane Anabel Hernandes, e cila ka publikuar së fundmi një libër me titull “Emma dhe zonjat e tjera të narkotrafikut”.

Sipas asaj që thuhet në libër, Guzman ishte ende i martuar me gruan e parë, Alejandrina Salazar, kur lidhi kurorë ligjërisht me Emma Coronel, me të cilën ka dy vajza të mitura 10-vjeçare.

Libri del në shitje më 25 janar dhe në të Hernandez tregon me prova se El Chapo është ende i martuar me Salazar. Ai fillimisht u martua me të në vitin 1977 dhe bashkë kanë 5 fëmijë, mes të cilëve edhe Iván Archivaldo dhe Jesús Alfredo, të dy të shpallur në kërkim nga Shtetet e Bashkuara, pasi akuzohen për trafik lëndësh narkotike. El Chapo gjithashtu flitet se është martuar me Griselda López në vitin 1980, e më pas me Coronel në vitin 2007, kur kjo e fundit ishte vetëm 18 vjeç dhe Guzman 50.

Sipas librit, në ceremoninë martesore të tyre morën pjesë politikanë, anëtarë të ushtrisë dhe guvernatori i shtetit. Në libër, Hernández flet edhe për gratë e tjera të bosëve të trafikut të kokainës në Meksikë. Dhjetorin e kaluar, edhe Coronel u dënua me burg për trafik droge dhe pastrim parash. Sipas ligjeve meksikane, bigamia mund të dënohet me burg, nga 2 deri në 5 vite.

Rruga Press