Homazhet për ish-senatorin Bob Dole/ Miku i tij shqiptar qëndron afër Joe Biden
SHBA- Nderimet e fundit për ish-senatorin Bob Dole janë zhvilluar ditën e enjte nga presidenti amerikan Joe Biden dhe udhëheqësit e kongresit amerikan. Mediat vendase shkruajnë se i ftuar personalisht për të marrë pjesë në homazhet e tij ka qenë dhe shqiptari Jim Xhema. Homazhet filluan me një ceremoni private ku morën pjesë Presidenti Joe Biden, e veja e senatorit, ish-Senatorja Elizabeth Dole, vajza e tyre Robin dhe miku i tij i ngushtë, Jim Xhema. Xhema kishte deklaruar se Dole ishte ndër liderët e parë politikë amerikanë që tërhoqi vëmendjen për atë që po ndodhte në Kosovë.
Jim Xhema luajti një rol të madh në përfshirjen e Senatorit Dole në mbështetje të kauzës së Kosovës. Gjatë vizitës së Bobe Dole në Prishtinë, në gusht 1990, fillo edhe ndërkombëtarëzimi i çështjes së Kosovës. Që nga ai moment e deri në çlirimin dhe shpalljen e pavarësisë, Dole ishte i pranishëm si një mbështetës i madh.
Xhema kishte shkruar edhe një letër mirënjohje për senatorin, me rastin e ditëlindjes së tij të 98.
“Në ditëlindjen e 98-të të senatorit Dole 22 korrik 2021 kujtojmë dhe vlerësojmë përpjekjet e tij kritike për të parandaluar agresionin serb, duke i dhënë drejtim ndërtimit të paqes dhe pavarësisë për Kosovën si një shtet sovran. Janë tri veprime konkrete të cilat e bëjnë të veçantë kontributin e tij për 30 vjet, sa ka shërbyer si Senator i SHBA-ve dhe Drejtues i Shumicës”, -thuhet në letrën e tij.
Lidhja mes veprimtarit Jim Xhema dhe udhëheqësit të shquar amerikan do të vijojë për brezat e ardhshëm, pasi investimin bujar të shqiptaro-amerikanit të njohur, një Institut studimesh dhe aktivitetesh me emrin e Senatorit Dole janë ngritur pranë Universitetit Shtetëror në Kansas. Si kusht, nga Xhema, Kosova dhe kombi shqiptar do jenë tema të vazhdueshme studimesh e konferencash në këtë institutcion.
Ish-senatori amerikan Bob Dole u nda nga jeta dhjetë muaj pasi bëri të ditur se ishte diagnostifikuar me kancer në mushkëri, në moshën 98-vjeçare.
Rruga Press