HEC-et, banorët e Kaçinarit Mirditë dalin në protestë: Po dëmtohet mjedisi në zonë, jemi kundër projektit

Rikthehen në protestë banorët e Kaçinarit në Mirditë, të cilët janë kundër ndërtimit të katër hidrocentraleve në këtë zonë. Sipas tyre projektet dëmtojnë lumenjtë dhe mjedisin në zonë. Ndërkohë me anë të një njoftimi, pas protestës, kompania u shpreh se nuk do të dëmtojë mjedisin dhe burimet ujore, ndërsa ka premtuar një investim për rehabilitimin e infrastrukturës në zonë.
Banorët e fshatrave të Njësisë Administrative të Kaçinarit në Mirditë dolën sërish në protestë kundër ndërtimit të katër hidrocentraleve në zonë, duke shprehur shqetësimin për pasojat e mundshme në mjedis dhe jetesën e tyre.

Të mbledhur në Qafë Vorrez, ku është vendosur kantieri i firmës koncensionare, qytetarët mbanin pankarta dhe brohorisnin kundër projekteve që, sipas tyre, rrezikojnë lumenjtë dhe burimet ujore të zonës.

Banorët kërkojnë largimin e makinerive të kompanisë nga zona e Kaçinarit, pasi janë të vendosur në rezistencën e tyre kundër zbatimit të këtyre projekteve.

Lejet për ndërtimin e katër HEC-eve në zonën e Kaçinarit në Mirditë janë dhënë në vitin 2019-të dhe janë rinovuar sërish konform ligjit. Pas  protestës, kompania ndërtuese e hec-eve reagoi duke u shprehur se prej disa ditësh mjetet kanë zbarkuar në terren, fillimisht në rehabilitimin e rrugës dhe kryerjen një sërë investimesh të tjera në zonë konform kontratës së lidhur me Bashkinë të cilat kapin vlerën e 1.5 milionë eurove, e më pas do të vijohet me ndërtimin e HEC-eve që sipas kompanisë nuk cënon mjedisin dhe burimet ujore, por i jep zhvillim Kaçinarit, duke ndihmuar në ekonominë e banoreve dhe zhvillimin e turizmit.

Rruga Press