Haxhiu: Përbërja e re e KPK-së hap rrugë për transparencë dhe pavarësi në drejtësi
Ministrja e Drejtësisë, Albulena Haxhiu, ka reaguar në rrjete sociale lidhur me ndryshimet e fundit ligjore që prekin Këshillin Prokurorial të Kosovës (KPK), duke i cilësuar ato si një hap të madh drejt rritjes së transparencës dhe pavarësisë së sistemit të drejtësisë.
Sipas Haxhiut, nga janari i vitit 2026 KPK do të nisë punën me një përbërje të re ligjore prej shtatë anëtarësh. Ajo theksoi se, ndryshe nga përbërja e mëparshme, balanci ndërmjet anëtarëve prokurorë dhe atyre jo-prokurorë do të jetë dukshëm më i afërt, çka sipas saj garanton vendimmarrje më të paanshme.
Ministrja vlerësoi se kjo përbërje e re parandalon që KPK të mbetet një rreth i mbyllur i grupeve të interesit brenda sistemit prokurorial, duke përfshirë edhe zëra të pavarur nga jashtë, të cilët marrin vendime pa ndikime të brendshme apo të jashtme.
Haxhiu bëri të ditur se sapo të konstituohet Kuvendi i Kosovës, do të sigurohet zgjedhja pa vonesa edhe e anëtarit të mbetur jo-prokuror, përmes një procedure që garanton përzgjedhjen e një kandidati të përgatitur dhe pa ndikime politike, në përputhje me Ligjin e ri.
Në fund, ajo theksoi se si përfaqësues të besuar të qytetarëve, institucionet mbeten të përkushtuara për ta çuar deri në fund reformën në drejtësi, me synimin për ndërtimin e një sistemi plotësisht të pavarur, të paanshëm dhe të besueshëm, që u ofron qytetarëve drejtësi efikase.
Reagimi i plotë:
KPK me përbërje të re, hap i madh për transparencë dhe pavarësi.
Si rezultat i ndryshimeve të miratuara, nga janari 2026 Këshilli Prokurorial i Kosovës fillon punën me përbërjen e re ligjore prej 7 anëtarë.
Për dallim nga përbërja e kaluar, balanci mes anëtarëve prokurorë dhe jo‑prokurorë është dukshëm më i afërt. Kjo siguron që KPK, si një institucion kyç për funksionimin e drejtësisë, të mos mbetet një rreth i mbyllur i grupeve të interesit brenda sistemit prokurorial, por të përfshijë edhe zëra të pavarur nga jashtë, që marrin vendime pa u ndikuar nga askush.
Sapo të konstituohet Kuvendi, do të sigurohemi që edhe anëtari i mbetur jo‑prokuror të zgjidhet pa vonesa, përmes një procedure që garanton përzgjedhjen e një kandidati të përgatitur dhe pa ndikime politike, e i cili propozohet nga Komisioni me përbërje profesionale, ashtu siç parasheh Ligji i ri.
Si përfaqësues të besuar të qytetarëve, mbetemi të përkushtuar të çojmë deri në fund pjesën tjetër të reformës në drejtësi.
Qëllimi ynë është i qartë dhe më i fortë se asnjëherë më parë, një sistem i drejtësisë plotësisht i pavarur, i paanshëm dhe i pandikuar as nga jashtë e as nga brenda, që u ofron qytetarëve drejtësi efikase dhe të besueshme.
Rruga Press