Hargreaves takohet me Haxhiun, mirëpret ratifikimin e marrëveshjeve ndërkombëtare dhe buxhetit 2026
Ambasadori i Mbretërisë së Bashkuar në Kosovë, Jonathan Hargreaves, është takuar me Kryeparlamentaren, Albulena Haxhiu, më 23.02.2026.
Ai ka shkruar se e ka uruar Haxhiun në zgjedhjen e saj në krye të Kuvendit.
“Kam mirëpritur progresin e shpejtë që Kuvendi ka bërë në ratifikimin e marrëveshjeve ndërkombëtare dhe buxhetin për vitin 2026”- ka shkruar mes tjerash Ambasadori Hargreaves.
Në këtë takim, sipas Ambasadorit është folur edhe për zgjedhjen e Presidentit të ri.
“Mezi presim të kemi bashkëpunim të ngushtë mes Kuvendeve të Kosovës dhe Mbretërisë së Bashkuar”- ka shkruar Hargreaves.
Jonathan Hargreaves në nëntor 2023 është emëruar ambasador i ri Britanisë së Madhe në Kosovë, duke zënë vendin e paraardhësit të tij, Nicholas Abbott.
Detyrën e kishte marrë tek në vitin 2024.
Hargreaves para se të marrë këtë detyrë ka qenë Përfaqësues Special i Mbretërisë së Bashkuar për Sirinë, nga viti 2020.
Ai paraprakisht, nga viti 2017 deri në vitin 2020, ka qenë i angazhuar si zëvendësdrejtor në Departamentin për Zhvillim Ndërkombëtar (DFID), në divizionin e Lindjes së Mesme dhe Afrikës së Veriut. Kurse nga viti 2014 deri në 2017-tën, Hargreaves ka qenë shef i Departamentit të Qeverisjes, Shoqërive të Hapura dhe Kundër Korrupsionit.
Angazhimet e Hargreaves përfshinë edhe rolin e tij si Shef i Zyrës dhe Shef i Programit Palestinez të DFID dhe zyrtar në Komisionin Europian në Bruksel.
Albulena Haxhiu është zgjedhur kryetare e Kuvendit të Kosovës më 11.02.2026.
Në mandatin e kaluar qeverisës, ajo ka qenë ministre e Drejtësisë.
Gjatë vitit 2025, pas zgjedhjeve të 9 shkurtit, Haxhiu ishte propozuar disa herë të zgjidhet Kryetare e Kuvendit nga LVV, por që kishte dështuar të zgjidhet. Në vend të saj ishte zgjedhur Dimal Basha, tashmë ministër i Infrastrukturës.
Rruga Press