Gurthemeli në ‘Zahir Pajaziti’, Kurti: Ia kemi borxh Llapit, ka dhënë yje

“FC Llapi ka traditë të gjatë në futboll. Edhe pak bëhen 100 vjet të këtij klubi. Nga ky klub kanë dalë emra të mëdhenj si Fadil Vokrri e Fazi Rama dhe i kemi borxh investimet në këtë klub”.

Kështu ka thënë Kryeministri në detyrë i Republikës së Kosovës, Albin Kurti, të enjten në vendosjen e gurthemelit për ndërtimin e tribunave dhe ndriçimit në Stadiumin “Zahir Pajaziti” në Podujevë.

“Jemi këtu bashkë me kryetarin e komunës dhe me ministrin në detyrë të Kulturës, Rinisë dhe Sportit, si dhe me miqtë e tjerë në rastin e vendosjes së gurëthemelit në stadiumin “Zahir Pajaziti”, ku luan Llapi. Llapi ka traditë të gjatë, edhe pak bëhen 100 vjeç dhe i kemi shumë borxh sepse nga këtu kanë dalë yjet e futbollit, duhet përmendur Fadil Vokrri e Rama”, ka thënë Kurti.

“Është shumë e rëndësishme sepse investimi në sport do të angazhojë talente të rinj që do ta ngrisin nivelin më të lartë në përgjithësi. Vendosja e gurë-themelit e kompleton këtë stadiumi. Ndriçimi do ta shndërrojë ‘Zahir Pajazitin’ në stadium të nivelit që i plotëson kriteret e UEFA-s”, ka theksuar Kurti.

Ndërkohë, kryetari i Komunës së Podujevës, Shpejtim Bulliqi është shprehur i lumtur që stadiumi ‘Zahir Pajaziti’ po bëhet stadium i niveleve evropiane.
“Kënaqësi që së bashku me Kurtin dhe Ministrin e Kulturës, po inguarojmë gurë-themelin e stadiumit ‘Zahir Pajaziti’, ku po krijohet mundësinë e finalizimit në të gjitha punët”, tha Bulliqi.

“Ndriçimi publik është më standardet e UEFA-s që i plotëson të gjitha kriteret. Besoj se me këtë investim i përmbyllim punët në stadiumin e Podujevës, tashmë të gjithë që do të vijnë që t’i shohin ndeshjet e Llapit dhe tjerat që do të luhen këtu do të kenë kushte të jashtëzakonshme. Faleminderit të gjithëve atyre që ndihmuan”, ka pohuar Bulliqi.

Rruga Press